भुसावळ, लोकशाही न्यूज नेटवर्क
भुसावलमधून मोठी बातमी समोर आली आहे. शहरातील मुकेश भालेराव या सराईत गुंडाची क्रूर हत्या करून गाडून टाकण्यात आल्याची धक्कादायक घटना घडलीय. यामुळे भुसावलमध्ये मोठी खळबळ उडाली आहे.
मिळालेल्या माहितीनुसार, मुकेश प्रकाश भालेराव ( वय 31, रा. टेक्नीकल हायस्कूल मागे भुसावळ ) यावर खुनाचा प्रयत्न, मारहाण, लुटमार, धमकी, खंडणी असे अनेक गंभीर गुन्हे दाखल असल्याने प्रशासनाने त्याला नाशिक येथे स्थानबध्द देखील केले होते. यातून बाहेर आल्यानंतर तो भुसावळ येथेच वास्तव्याला होता. सुमारे चार दिवसांपासून मुकेश भालेराव याला घरून काही तरूण घेऊन गेले होते. तेव्हापासून तो बेपत्ता झाला होता. त्याचा शोध घेऊन देखील तो मिळून न आल्यामुळे आज सकाळी त्याची पत्नी पोलीस स्थानकात तक्रार देण्यासाठी आली. दरम्यान, आज सायंकाळी सात वाजेच्या सुमारास मुकेश प्रकाश भालेराव याचा खून करून त्याचा मृतदेह हा तापी नदीच्या बाजूला असलेल्या भागात पुरून टाकण्यात आल्याची माहिती समोर येताच पोलिसांनी घटनास्थळी धाव घेऊन त्याचा मृतदेह बाहेर काढला.
मुकेश भालेराव याचे पार्थिव शवविच्छेदन करण्यासाठी पाठविण्यात आले असून शहर पोलीस स्थानकात या प्रकरणी गुन्हा दाखल करण्याचे काम सुरू होते. मुकेश प्रकाश भालेराव याची टोळी असून त्यांच्यावर तब्बल 26 गुन्हे दाखल आहेत.
