एकच वादा अजित दादा; भावी मुख्यमंत्री म्हणून झळकले बॅनर… दादा म्हणाले…

 

नाशिक, लोकशाही न्यूज नेटवर्क:

 

सध्याच राजकारण म्हटलं कि, कोण कोणासोबत युती करून सत्ता स्थापन करेल आणि पद मिळवेल याचा खुद्द मतदारांनाही भरोसा राहिलेला नाही. त्यात आज नाशिक येथील मेळाव्यात अजित पवार भावी मुख्यमंत्री असे बॅनर लक्ष आकर्षित करत होते.

सविस्तर वृत्त असे कि, काही दिवसांपूर्वी मुंबईतल्या राष्ट्रवादी काँग्रेसच्या कार्यालयाबाहेर अजित पवार भावी मुख्यमंत्री असा पोस्टर लावण्यात आलं होतं. याआधी मुंबईत जयंत पाटील भावी मुख्यमंत्री असे पोस्टरही लावण्यात आले होतं, यानंतर आता अजित पवारांसाठीचे पोस्टर लावण्यात आल्यामुळे राजकीय वर्तुळात चर्चांना उधाण आले होतं. यातच आज नाशिक जिल्ह्यातील सिन्नर तालुक्यात शेतकरी मेळावा आयोजित करण्यात आला आहे. या मेळाव्यात खुद्द अजित पवार आणि जितेंद्र आव्हाड हे उपस्थितीत आहे. पण, या मेळाव्यात उत्साही कार्यकर्त्यांनी भावी मुख्यमंत्री अजित पवार असं बॅनरच लावून एकच धुरळा उडवून दिला.

पण, काही उत्साही कार्यकर्त्यांनी मी मुख्यमंत्री व्हावं म्हणून बॅनर लावले, पण 145 आमदारांच्या पाठिंब्याशिवाय मुख्यमंत्री होता येत नाही, असं अजित पवार म्हणाले. असे पोस्टर लागले असतील तर त्याला मनावर घेऊ नका, फार महत्त्व देऊ नका. उद्या जर मी तुमचं होर्डिंग लावलं, तरी 145 आमदारांचा पाठिंबा मिळत नाही तोपर्यंत त्या होर्डिंग लावण्याला काहीही अर्थ नाही. हे फक्त कार्यकर्त्याचं वैयक्तिक समाधान असतं, असं उत्तर अजित पवारांनी यावेळी दिलं.