मुंबई, लोकशाही न्यूज नेटवर्क
राज्यातील एकात्मिक बालविकास सेवा योजनेअंतर्गत कार्यरत अंगणवाडी सेविका व मदतनीसांची दिवाळी गोड होणार आहे. दिवाळीपूर्वीच शासनाकडून त्यांना भाऊबीज भेट म्हणून प्रत्येकी दोन हजार रुपये देण्यात येणार असल्याची माहिती महिला व बालविकास मंत्री आदिती तटकरे यांनी १४ ऑक्टोबर रोजी दिली.
राज्यात सध्या १ लाख ८ हजार ६२७ अंगणवाडी सेविका आणि १ लाख ५ हजार ४७० अंगणवाडी मदतनीस कार्यरत आहेत. अशा एकूण २ लाख १४ हजार ९७ सेविका व मदतनीसांना या निर्णयाचा लाभ मिळणार आहे. यासाठी शासनाकडून ४२ कोटी ८१ लाख ९४ हजार रुपयांचा निधी उपलब्ध करून देण्यात आला आहे.
मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा अजित पवार यांच्या मार्गदर्शनाखाली हा निर्णय घेण्यात आला आहे. राज्यातील गर्भवती महिला, स्तनदा माता आणि बालकांच्या पोषणाची जबाबदारी पार पाडणाऱ्या अंगणवाडी सेविका व मदतनीस यांच्या कार्याची दखल घेत त्यांची दिवाळी आनंदात जावी, हा या निर्णयामागील उद्देश असल्याचे मंत्री आदिती तटकरे यांनी सांगितले.
या निर्णयामुळे राज्यातील अंगणवाडी सेविका व मदतनीसांना दिवाळीपूर्वी आर्थिक भेट मिळणार असून, सणाच्या काळात त्यांना दिलासा मिळणार आहे.

