पाचोरा, लोकशाही न्यूज नेटवर्क
तालुक्यातील कुऱ्हाड तांडा परिसरात जुन्या वादातून एका तरुणावर प्राणघातक हल्ला झाल्याची धक्कादायक घटना समोर आली आहे. या घटनेत नातेवाईकांवर धारदार शस्त्राने वार करून त्यांची हत्या करण्याचा प्रयत्न करण्यात आला. या प्रकरणी पिंपळगाव हरे पोलीस ठाण्यात सात संशयित आरोपींविरुद्ध विविध कलमान्वये खुनाचा प्रयत्न केल्याचा गुन्हा दाखल करण्यात आला आहे.
पाचोरा तालुक्यातील कुऱ्हाड तांडा या गावात रात्री दहा वाजेच्या सुमारास सुमित रूपचंद तंवर हे आपल्या घराबाहेर होते. यावेळी जुन्या वादाच्या कारणावरून रणवीर ऊर्फ मणी सुरेश चव्हाण, सुमित अंकुश राठोड, आकाश शांताराम ठाकरे, दीपक मांगीलाल राठोड, आकाश राजू राठोड, गोपाळ ठाकरे आणि एक अनोळखी तरुण यांनी एकत्र येऊन फिर्यादी आणि त्यांचे चुलत भाऊ हिनेश इंद्रजित तंवर यांना घेरले.
दरम्यान आरोपींनी तुम्हाला जिवंत सोडणार नाही, अशी धमकी देत इंद्रजित तंवर यांच्यावर धारदार चाकूंनी हल्ला केला. त्यांच्या छातीवर आणि पोटावर सपासप वार करून त्यांना गंभीर जखमी करण्यात आले. या प्राणघातक हल्ल्यामुळे परिसरात मोठी खळबळ उडाली आहे. घटनेची माहिती मिळताच पिंपळगाव हरे पोलिसांनी घटनास्थळी धाव घेतली. या प्रकरणी पिंपळगाव हरेश्वर पोलीस ठाण्यात गुन्हा दाखल करण्यात आला आहे. या प्रकरणाचा तपास पोलीस उपनिरीक्षक विठ्ठल पवार करत आहेत.
