जळगाव जिल्हा श्रमण संघ अध्यक्षपदी अशोक जैन
जिल्हास्तरीय ‘श्रमण संघ’ अधिवेशन संपन्न
जळगाव (प्रतिनिधी) – श्रमण संघीय उपाध्याय प्रवर प.पू.प्रवीण ऋषीजी म.सा. होळी चातुर्मासानिमित्त जळगावत उपस्थित आहेत. त्यांच्या सान्निध्यात शहरातील स्वाध्याय भवन येथे श्रमण संघाचे जळगाव जिल्हास्तरीय अधिवेशन संपन्न झाले. या अधिवेशनासाठी जळगाव शहरातील, परिसरातील, भुसावळ, जामनेर, पहूर, चाळीसगाव, शेंदुर्णी, बोदवड, नशिराबाद, धरणगाव, पाचोरा येथून सुश्रावक-सुश्राविका मोठ्या संख्येने उपस्थित होते.
आचार्य आनंदऋषीजी महाराज साहेब यांनी श्रमण संघाच्या आणि एकुणच सर्व मान्यता, परंपरा यांना एका मंचावर आणण्यासाठी तसेच धर्मोन्नतीसाठी आयुष्य वेचले. ‘जैन आगम’, ‘जैन दर्शन’ लोकांपर्यंत सोप्या भाषेत पोहोचविले. त्यांच्या नेतृत्वात स्थापन झालेल्या मोठ्या आणि वर्षानुवर्षे चालत आलेल्या ‘श्रमण संघ’ या परंपरेचे सदस्य असल्याचा आम्हास गौरव असला पाहिजे, महाराज साहेब आपल्या प्रवचनात बोलत होते. जळगाव श्री संघाचा व वर्षीतप पारणा व्यवस्थेचा गौरव करण्यात आला.
अधिवेशनाचे प्रास्ताविक अशोक जैन यांनी केले. संघ एकतेसाठी चर्चा होऊन ठराव पारीत करण्यात आले. जळगाव जिल्ह्याच्या श्रमण संघ अध्यक्षपदी जैन इरीगेशनचे चेअरमन अशोक भवरलाल जैन यांच्या नावाचा ठराव सर्वानुमते पारीत करण्यात येऊन तशी घोषणा आपल्या अध्यक्षीय भाषणात माजी मंत्री, संघाचे ज्येष्ठ आधारस्तंभ सुरेशदादा जैन यांनी केले. आपल्या आशीर्वादपर भावना संघपती दलुभाऊ जैन यांनी व्यक्त केल्या. पुण्याहून आनंद तीर्थचे अध्यक्ष सतीश सुराणा, सुभाष मुथा यांनी चिचोंडी-अहिल्यानगर येथे साकारत असलेल्या ‘आनंदतीर्थ’ या महत्वाकांक्षी प्रकल्पाची माहिती दिली. “गुरु आनंद दीक्षा मंत्र” प्रदान करण्यात आला. गुरु आनंद यांची प्रतिमा कोठारी परिवारातर्फे देण्यात आली. सूत्रसंचालन सीए अनिल कोठारी यांनी केले तर आभार सुरेंद्र नथमल लुंकड यांनी मानले.
गौतम प्रसादी भोजन व्यवस्था, भवरलाल आणि कांताबाई जैन परिवारातर्फे करण्यात आले.
