दररोज आवळ्याचे सेवन आरोग्यासाठी वरदान
पचन, त्वचा व केसांसाठी उपयुक्त ; शरीरासाठी अनेक प्रकारे लाभदायक
लोकशाही न्यूज नेटवर्क
नैसर्गिक जीवनशैली अंगीकारण्याचा सल्ला दिला जात असताना, त्यात आवळा हे फळ अत्यंत उपयुक्त मानले जाते. आयुर्वेदात ‘अमृत’ समजल्या जाणाऱ्या आवळ्याचे सेवन किंवा त्याचा ज्यूस पिणे शरीरासाठी अनेक प्रकारे लाभदायक ठरते.
आवळ्यात विटामिन C मुबलक प्रमाणात असून ते रोगप्रतिकारक शक्ती वाढवणारे नैसर्गिक बूस्टर आहे. दररोज एक आवळा खाल्ल्यास शरीराची रोगप्रतिकारक शक्ती मजबूत राहते आणि सर्दी, ताप, अॅलर्जी यांसारख्या हंगामी आजारांपासून बचाव होतो.
पचनाच्या समस्या असणाऱ्यांसाठीही आवळा अत्यंत फायदेशीर आहे. आवळ्यातील तंतुमय घटक पचनक्रिया सुधारतात, आम्लपित्त कमी करतात आणि आतड्यांचे आरोग्य राखतात. त्यामुळे ज्यांना वारंवार पोटदुखी, गॅस किंवा अपचनाचा त्रास होतो, त्यांनी दररोज आवळ्याचे सेवन करणे उपयुक्त ठरते.
केस आणि त्वचेसाठीही आवळा हे सर्वोत्तम नैसर्गिक औषध आहे. आवळ्याच्या नियमित सेवनाने केस गळणे, अकाली पांढरे होणे आणि त्वचेवरील डाग, सुरकुत्या यांसारख्या समस्या कमी होतात. त्वचा उजळ आणि टवटवीत राहते.
तज्ज्ञांच्या मते, सकाळी रिकाम्या पोटी एक आवळा खाणे किंवा त्याचा ताजा ज्यूस पिणे हे आरोग्य टिकविण्याचे सर्वोत्तम साधन आहे. त्यामुळे “दररोज एक आवळा – आयुष्यभर चांगले आरोग्य” हा मंत्र पाळल्यास शरीर निरोगी आणि तंदुरुस्त राहते.
