चोरीच्या दुचाकीसह अवघ्या चार तासात चोरटा जेरबंद
अमळनेर प्रतिनिधी चोपडा तालुक्यातील गणपूर येथील जयपाल इंदरसिंग राजपूत यांची एचएफ डीलक्स मोटरसायकल (क्रमांक MH 19 DP 4541) दिनांक ९ ऑक्टोबर २०२५ रोजी दुपारी १२ ते १:३० वाजेच्या सुमारास अमळनेर न्यायालयाच्या गेटजवळील पार्किंगमधून अज्ञात चोरट्याने चोरली. जयपाल हे मित्रासोबत न्यायालयीन कामासाठी आले होते. याप्रकरणी अमळनेर पोलीस ठाण्यात तक्रार दाखल करण्यात आली.
पोलीस निरीक्षक दत्तात्रय निकम यांच्या मार्गदर्शनाखाली पोलीस उपनिरीक्षक समाधान गायकवाड यांच्या नेतृत्वात गुन्हे अन्वेषण विभागाचे पथक, ज्यामध्ये पोलीस हेड कॉन्स्टेबल मिलिंद सोनार, कॉन्स्टेबल विनोद संनदनशिव आणि उदय बोरसे यांचा समावेश होता, त्यांनी तातडीने तपास सुरू केला. मिळालेल्या माहितीच्या आधारे अवघ्या चार तासांत आरोपी धनंजय रवींद्र पाटील (रा. विद्यानगरी, देवपूर, धुळे) याला मोटरसायकलसह ताब्यात घेण्यात आले.
धनंजय हा कौटुंबिक हिंसाचाराच्या खटल्याच्या तारखेसाठी न्यायालयात आला होता. न्यायालयीन कामकाज आटोपल्यावर त्याने मास्टर कीच्या साहाय्याने मोटरसायकलचे लॉक उघडून चोरी केली आणि धुळे येथे पळून जाण्याचा प्रयत्न केला. यापूर्वीही त्याने धरणगाव पोलीस ठाण्याच्या हद्दीत बुलेट मोटरसायकल चोरी केली होती, ज्यासाठी त्याला अटक झाली होती.
दिवाळीच्या आगामी सणानिमित्त नागरिक बाहेरगावी नातेवाइकांकडे जातात. अशा वेळी घरात रोख रक्कम आणि मौल्यवान दागिने ठेवू नये, तसेच चोरीच्या घटनांपासून सावध राहण्यासाठी सीसीटीव्ही कॅमेरे बसवावेत, असे आवाहन पोलीस निरीक्षक दत्तात्रय निकम यांनी केले आहे.
ही कारवाई पोलीस अधीक्षक महेश्वर रेड्डी, अपर पोलीस अधीक्षक कविता नेरकर आणि उपविभागीय पोलीस अधिकारी विनायक कोते यांच्या मार्गदर्शनाखाली करण्यात आली. पुढील तपास हेड कॉन्स्टेबल मिलिंद सोनार करत आहेत.
