अमळनेर | प्रतिनिधी गलवाडे रस्त्यावर २७ एप्रिल रोजी पहाटे दीड वाजता ट्रक अडवून चालकाच्या गळ्याला चाकू लावून एक हजार रुपये हिसकावण्याचा आणि ट्रक मालकाकडून एक लाख रुपयांची मागणी करत खून करण्याची धमकी दिल्याची धक्कादायक घटना घडली. अमळनेर पोलिसांनी तात्काळ कारवाई करून पॅरोलवर बाहेर आलेल्या गुन्हेगार कैलास नवघरे याला अटक केली आहे.
अनिल अश्रूबा विलग (रा. कोनोसी, ता. शिवगाव, जि. अहिल्यानगर) हे स्वप्नील झिने यांच्या मालकीच्या हायवा ट्रक (MH-16-CE-4797) चालवत होते. भुसावळहून नरडाणा येथे जात असताना गलवाडे रस्त्यावर मोटारसायकलवर आलेल्या तिघांनी ट्रक आडवला. आरोपी कैलास नवघरे (अमळनेरचा डॉन म्हणून स्वतःची ओळख करून दिली) याने ट्रकच्या केबिनमध्ये घुसून चालकाच्या गळ्याला चाकू लावला आणि एक लाख रुपयांची खंडणी मागितली. त्याने चालकाच्या खिशातून एक हजार रुपये जबरदस्तीने काढून घेतले.
त्यानंतर दुसऱ्या आरोपीने आपले नाव मोझम शेख असल्याचे सांगत ट्रक मालकाला फोन करून धमकी दिली की, पैसे न दिल्यास चालकाचा खून केला जाईल. चालकालाही दबाव टाकून मालकाकडून पैसे मागवण्यास भाग पाडले. आरोपींनी ट्रक बाजूच्या कॉलनीकडे नेत असतानाच चालकाच्या सतर्कतेने मालकाने तातडीने अमळनेर पोलिसांना कळवले.
पोलीस निरीक्षक दत्तात्रय निकम यांच्या मार्गदर्शनाखाली पोलीस पथकाने घटनास्थळी धाव घेतली. पोलिसांना पाहताच मोझम शेख व तिसरा साथीदार फरार झाला, मात्र कैलास नवघरेला पकडण्यात आले. कैलास नवघरे हा यापूर्वी खून प्रकरणात शिक्षा भोगून पॅरोलवर बाहेर होता आणि २७ एप्रिल रोजीच तुरुंगात परतण्याची त्याची मुदत होती.
या प्रकरणी जबरी चोरी व खंडणीचा गुन्हा दाखल करण्यात आला असून, तपास पोलीस उपनिरीक्षक राजू जाधव करीत आहेत.
