अमळनेर, लोकशाही न्यूज नेटवर्क
दिवाळीच्या पावन सणावर धक्कादायक घटना समोर आली आहे. अमळनेर तालुक्यातील कावपिंप्री येथे शौचालयाच्या टाकीत पडून दोन वर्षांच्या चिमुकल्याचा दुदैवी मृत्यू झाल्याची घटना सोमवार दि. १२ रोजी सायंकाळी ५ वाजेच्या सुमारास घडली. भूषण दिलीप सोनवणे (वय २) असे मयत चिमुकल्याचे नाव असून याप्रकरणी अमळनेर पोलीस स्टेशनला अकस्मात मृत्यूची नोंद करण्यात आली आहे.
अमळनेर तालुक्यातील कावपिंप्री येथील अशोक सोनवणे यांच्या नवीन घराचे बांधकाम सुरू असून त्याठिकाणी शौचालयाच्या टाकीचे बांधकाम करून ही टाकी पुर्णपणे पाण्याने भरलेली होती. या टाकीजवळ खेळतांना भूषण दिलीप सोनवणे (वय २) हा चिमुकला टाकीत पडल्याने त्याचा पाण्यात बुडून मृत्यू झाला.
दरम्यान आजोबा लिलाधर गोविंदा सोनवणे यांना शौचालयाच्या टाकीत चिमुकला भूषण हा टाकीत मृतवस्थेत दिसून आला. त्याला बाहेर काढून तातडीने अमळनेर येथील ग्रामीण रूग्णालयात दाखल केले असता वैद्यकीय अधिकारी यांनी मयत घोषीत केले.
