लोकशाही संपादकीय लेख
केंद्रीय राज्यमंत्री रक्षा खडसे व खडसे परिवाराच्या संदर्भात नंदुरबारचे विजय चौधरी यांनी टेलिफोनवरून जे अर्वाच्य संभाषण केले आहे, त्यांच्या निषेधार्थ आणि त्यांच्यावर कारवाई करण्यासंदर्भात मुक्ताईनगर व रावेर येथे सर्वपक्षीय तसेच सर्व जाती-धर्मांच्या समाजातर्फे विजय चौधरी यांच्या निषेधार्थ मोर्चे काढण्यात आले.
लोकशाहीमध्ये कुणालाही व्यक्त होण्याचे स्वातंत्र्य असले तरी त्याला काही मर्यादा असतात. महिलेविषयी आपण काय बोलतो आहोत, याचे भान राखले पाहिजे. ते भान विजय चौधरी यांनी राखलेले नाही. रक्षा खडसे आणि रोहिणी खडसे यांच्या विरोधात अश्लील भाषेचा त्यांनी अक्षरशः कळस केला. त्या विजय वसंत चौधरी यांच्यावर जिल्हा प्रशासनाने कारवाई करावी. त्यांच्यावर फौजदारी गुन्हा दाखल करून त्यांना अटक करण्यात यावी, अशा आशयाचे निवेदन मुक्ताईनगर आणि रावेर येथे सर्वपक्षीय मेळाव्यातून देण्यात आले.
तातडीने ही कारवाई प्रशासनाने करावी, अन्यथा तीव्र आंदोलन छेडण्यात येईल, असा इशारादेखील देण्यात आला. यापूर्वी नंदुरबार येथेही सर्वपक्षीय तसेच लेवा पाटीदार गुजर समाजाच्या वतीने मोर्चा निघाला होता. नंदुरबार येथे जिल्हाधिकाऱ्यांना निवेदन देण्यात आले, तर मुक्ताईनगर आणि रावेर येथे तहसीलदारांना निवेदन देण्यात आले. विजय चौधरी यांच्यावर फौजदारी गुन्हा दाखल करून त्यांना तातडीने अटक करावी, अशी मागणी करण्यात आली. जळगाव जिल्ह्यात ठिकठिकाणी असे मोर्चे निघण्याचा सिलसिला सुरू आहे.
