घड्याळामध्ये छुपा कॅमेरा बसवून केले स्टिंग ऑपरेशन; अ‍ॅड. प्रवीण चव्हाणांचा खुलासा

मुंबई, लोकशाही न्यूज नेटवर्क

राज्याचे विरोधी पक्षनेते देवेंद्र फडणवीस यांनी विधानसभेत पेनड्राईव्ह बॉम्ब टाकल्यापासून सर्वत्र खळबळ उडाली आहे. या स्टिंग ऑपरेशनमध्ये देवेंद्र फडणवीसांनी केलेले आरोप विशेष सरकारी वकील प्रवीण चव्हाण यांनी फेटाळून लावले आहेत.

जळगावातील नूतन मराठा शिक्षण प्रसारक मंडळ ही संस्था ताब्यात घेण्यासाठी संस्थेचे अध्यक्ष ॲड.विजय पाटील यांना पुण्यात एका हॉटेलमध्ये बोलावून मारहाण करून संस्थेची कागदपत्रे ताब्यात घेण्याचा प्रयत्न गिरीश महाजनांनी त्यांच्या हस्तकांनी केला अशी फिर्याद तीन वर्षानंतर जळगावच्या निंभोरा पोलिस स्टेशनला दाखल केला. तो नंतर पुणे येथील पोलिस स्टेशनला वर्ग करण्यात आला. पुणे पोलिसांनी या फिर्यादीची दखल घेवून भोईटे गट आणि गिरीश महाजनसह त्यांचे स्वीय सहाय्यक रामेश्वर नाईक यांचेवर गुन्हा दाखल करून कारवाई केली.

दरम्यान या प्रकरणातील विशेष सरकारी वकील प्रवीण चव्हाण यांचे स्टिंग ऑपरेशनच्या माध्यमातून रेकॉर्ड केलेले व्हिडीओ देवेंद्र फडणवीस यांनी विधानसभेत उघड केले. प्रवीण चव्हाण हे गिरीश महाजन यांना बनावट गुन्हात अडकवण्याचा प्रयत्न करत असल्याचा आरोप देवेंद्र फडणवीस विधिमंडळात यांनी केला. याप्रकरणी विशेष सरकारी वकील प्रवीण चव्हाण यांनी एका वृत्तवाहिनीवर आपली बाजू मांडली.

यावेळी चव्हाण म्हणाले की, फडणवीसांनी सादर केलेल्या व्हिडीओमध्ये वाक्यांची मोडतोड करण्यात आली असून सर्व रेकॉर्डिंग समोर येण्याची गरज आहे, तसेच जळगावचा तेजस मोरे नावाचा तरुण अशील म्हणून आपल्याकडे आला आणि त्याने हे स्टिंग ऑपरेशन केलं आहे. या स्टिंग ऑपरेशनमधील जळगाव कनेक्शन उघड होतं आहे.

तसेच प्रवीण चव्हाण म्हणाले की, या प्रकरणात पुरावे आहेत म्हणून कारवाई होतेय. माझे रेकॉर्डिंग मॅनिप्युलेट करुन वापरण्यात आलं आहे. व्हिडीओ आणि ऑडिओ वेगळे आहेत. वाक्ये अर्धवट वापरण्यात आली आहेत. माझ्या ऑफिसात अशील म्हणून येणाऱ्या तेजस मोरेने हे स्टिंग ऑपरेशन केले आहे. त्यासाठी त्याने समोरच्या काचेच्या भिंतीवर लावायला घड्याळ भेट दिले आणि त्यात छुपा कॅमेरा बसवला.

यावेळी चव्हाण म्हणाले की, तेजस मोरे हा तुरुंगात होता आणि जामिन मिळवण्यासाठी माझ्याकडे येत होता. तेजस मोरे हा मूळचा जळगावचा असून हे सर्व प्रकरण जळगावमधूनच करण्यात आलं आहे. या प्रकरणात तेजस मोरेला अनेकांची साथ आहे. माझ्याकडे असलेल्या केसेसमधे जे आरोपी तुरुंगात आहेत त्यांनी देखील याला साथ आहे. यावेळी मी कुणाचेही नाव घेतलेले नाही. दरम्यान सदर प्रकरणाची चौकशी करण्यात यावी, असे देखील देखील प्रवीण चव्हाण म्हणाले.