पोंभूर्णा, लोकशाही न्यूज नेटवर्क
पोंभूर्णा तालुका कृषी कार्यालयात आवश्यक मनुष्यबळ उपलब्ध नसल्याने शेतकऱ्यांची विविध शासकीय कामे रखडत असून, दररोज कार्यालयाच्या फेऱ्या माराव्या लागत आहेत. अनेक पदे रिक्त असल्याने उपलब्ध कर्मचाऱ्यांवर अतिरिक्त कामाचा ताण वाढला असून त्याचा थेट फटका शेतकरी व नागरिकांना बसत आहे.
पीकविमा, पीक पाहणी, विविध कृषी योजनांचे प्रस्ताव, अनुदान प्रकरणे, ई-पीक नोंदणी, कृषी अवजारे अनुदान, बियाणे व खत योजनांसह विविध शासकीय कामे वेळेत पूर्ण होत नसल्याच्या तक्रारी वाढत आहेत. एकाच कर्मचाऱ्याकडे अनेक जबाबदाऱ्या असल्याने कार्यालयीन कामकाजावर परिणाम होत आहे.
विशेषतः खरीप हंगाम सुरू असताना कृषी विभागाची भूमिका महत्त्वाची असते. मात्र कर्मचाऱ्यांच्या कमतरतेमुळे शेतकऱ्यांना आवश्यक मार्गदर्शन, योजनांची माहिती व सेवा वेळेवर मिळत नसल्याची खंत शेतकऱ्यांनी व्यक्त केली आहे.
पोंभूर्णा कृषी कार्यालयातील रिक्त पदे तातडीने भरून आवश्यक कर्मचारी उपलब्ध करून द्यावेत, जेणेकरून शेतकऱ्यांची कामे सुरळीत व वेळेत होतील, अशी मागणी शेतकरी व नागरिकांकडून करण्यात येत आहे. तसेच या प्रश्नाकडे संबंधित विभागाने गांभीर्याने लक्ष देऊन तातडीने मनुष्यबळ उपलब्ध करून द्यावे, अशी अपेक्षाही व्यक्त केली जात आहे.
