लोकशाही न्यूज नेटवर्क
भुसावळ बाजारपेठ पोलीस ठाण्याच्या हद्दीत बेकायदेशीररीत्या भारतात वास्तव्यास असलेल्या एका महिलेविरुद्ध कारवाई करण्यात आली आहे. संबंधित महिलेविरुद्ध इमिग्रेशन आणि परदेशी कायदा २०२५ अंतर्गत गुन्हा दाखल करण्यात आला असून या प्रकरणामुळे परिसरात खळबळ उडाली आहे. यापूर्वी जळगाव येथेही अशाच प्रकारचे प्रकरण समोर आले होते.
पोलिस तपासात संबंधित महिलेचे मूळ नाव फरीदा बेगम मोहम्मद खान (वय ४२) असून ती बांगलादेशातील पीरोजपूर जिल्ह्यातील रहिवासी असल्याचे समोर आले. भारतात आल्यानंतर ती “जस्मिन बी मोहम्मद खान” या नावाने भुसावळातील दीनदयाल नगर परिसरात राहत होती.
प्राथमिक चौकशीत तिने २००९ मध्ये दलालाच्या मदतीने नदीमार्गे पश्चिम बंगालमध्ये बेकायदेशीर प्रवेश केल्याची माहिती पोलिसांना दिली. त्यानंतर ती रेल्वेने भुसावळ येथे आल्याचे तपासात उघड झाले. पोलिसांनी तिच्याकडील मोबाईल जप्त करून तांत्रिक तपास केला असता, बांगलादेशातील क्रमांकांशी सातत्याने संपर्क झाल्याचे आढळून आले. तसेच मोबाईलमध्ये तिच्या जन्मदाखल्याची प्रतही मिळाली.
तपासादरम्यान संबंधित महिलेने विविध कागदपत्रांचा वापर करून रेशन कार्ड, आधार कार्ड, मतदान ओळखपत्र, पॅन कार्ड, बँक पासबुक तसेच भारतीय पासपोर्ट तयार करून घेतल्याचे निष्पन्न झाले. या पासपोर्टच्या आधारे ती मे २०२३ मध्ये बांगलादेशात जाऊन पुन्हा भारतात परतल्याची माहिती समोर आली आहे. या प्रकरणात बनावट कागदपत्रे तयार करून देणारे एजंट, दलाल आणि संबंधित व्यक्तींचा शोध सुरू असून पोलीस अधिक तपास करत आहेत.
