डोक्यात हवा जाऊ न देता वागा!

मुंबई, लोकशाही न्यूज नेटवर्क

कमी कालावधीत अधिक यश मिळाल्याने बदनामीचे डाव आखले जात आहेत. त्यामुळे प्रत्येक गोष्टीची काळजी घ्या, पुढील काळ कसोटीचा आहे, अशा शब्दांत उपमुख्यमंत्री एकनाथ शिंदे यांनी पक्षाच्या आमदारांना सावध केल्याचे समजते. ‘मी प्रमुखासारखे नव्हे, तर कार्यकर्त्यासारखे वागतो. त्यामुळे तुम्ही पण डोक्यात हवा जाऊ देऊ नका आणि सर्वसामान्यांची कामे करा,’ अशा शब्दांत त्यांनी आमदारांची कानउघाडणी केली.

शिवसेनेच्या मंत्र्यांविषयी, तसेच आमदारांच्या विरोधात विरोधी पक्षाकडून सातत्याने आरोप केले जात आहेत. सामाजिक न्यायमंत्री संजय शिरसाट, रोजगार हमी योजनामंत्री भरत गोगावले यांचे व्हिडीओ सोशल मीडियावर व्हायरल झाले. त्यातच आमदार संजय गायकवाड यांनी आमदार निवासातील उपाहारागृहातील कर्मचाऱ्यांना मारहाण केल्याचे समोर आले. त्यामुळे पक्षाच्या विरोधात ऐन अधिवेशनकाळात विरोधी पक्षाला आयतेच कोलीत मिळाले. या सर्व पार्श्वभूमीवर शिवसेनेच्या वादग्रस्त मंत्री आणि आमदारांना एकनाथ शिंदे यांनी कानपिचक्या दिल्याचे समजते.

तुमच्याकडे दाखवलेले बोट माझ्याकडे असते. तुमचे आमदार काय करतात, असा प्रश्न मला विचारला जात आहे. तुम्ही सगळी माझी माणसे आहात. आपले कुटुंब एक आहे. तुमची बदनामी म्हणजे माझी बदनामी आहे. त्यामुळे तुम्ही चुकीच्या गोष्टींवर ऊर्जा वाया घालवू नका. कमी बोला आणि जास्त काम करा. बदनामीमुळे काही मंत्र्यांना घरी जावे लागले आहे, हे लक्षात ठेवा, असे सांगत त्यांनी वादग्रस्त मंत्री, तसेच आमदारांना अप्रत्यक्ष कारवाईचा इशाराही दिला आहे.

कारवाईचा इशारा

आपल्या कुटुंबावर कारवाईचा बडगा उगारायला मला अजिबात आवडणार नाही. परंतु, मला कारवाई करायला भाग पडणार नाही, असेच काम तुमच्याकडून अपेक्षित आहे. मी रागावत नाही. मी प्रमुखासारखे वागत नाही. कार्यकर्त्यासारखे वागतो. त्यामुळे तुम्हीही तसेच वागा. आपल्या डोक्यात हवा जाऊ देऊ नका. कितीही पदे मिळाली तरी कार्यकर्ता आहे, असेच समजून कामे करा, असा सल्लाही शिंदे यांनी आमदारांना दिला.