अतिवेग नडला ,जीवावर बेतला ; दुचाकी वीज खांबाला धडकून एकाचा मृत्यू ,एक गंभीर

पुणे : – पुण्यात भरधाव वेगातील बाईकला झालेल्या अपघातात एका तरुणाचा गंभीर जखमी होऊन जागीच मृत्यू झाला. तर एक तरुण गंभीर जखमी झाला आहे. हा अपघात शुक्रवारी मध्यरात्री दोन वाजण्याच्या सुमारास खडकवासला परिसरातील कुडजे येथे झाला. जखमी झालेल्या तरुणावर रुग्णालयात उपचार सुरु आहेत.

यशोधन अविनाश देशमुख (वय-23) असे मृत्यू झालेल्या तरुणाचे नाव आहे. तर हर्षल दिपक पाटील (वय-24) हा गंभीर जखमी झाला आहे. दोघे तरुण पुण्यातील बावधनमधील पेंबल्स अर्बनीया सोसायटीमध्ये राहतात.

यशोधन आणि हर्षल हे खडकवासला परिसरात फिरायला गेले होते. त्यावेळी यशोधन भरधाव वेगात दुचाकी चालवत होता. कुडजे गावातून मुख्य रस्त्याने पुढे आगळंबे फाट्याकडे जाताना साहिल हॉटेलच्या जवळ यशोधनचा बाईकवरील ताबा सुटला. यशोधन याच्या बाईकची विजेच्या लोखंडी खांबाला जाऊन जोरात धडकली. या अपघातात यशोधनच्या डोक्याला गंभीर दुखापत झाली आणि त्याचा जागीच मृत्यू झाला. तर हर्षल गंभीर जखमी झाला. या अपघातात बाईकचे नुकसान झाले. तसेच विजेचा खांब वाकला आहे, अशी माहिती पोलिसांनी दिली. पोलीस हवालदार सचिन प्रभाकर गायकवाड यांनी उत्तमनगर पोलीस ठाण्यात फिर्याद दिली . याबाबत उत्तमनगर पोलिसांनी गुन्हा दाखल केला आहे पुढील तपास पोलीस उपनिरीक्षक क्षीरसागर करीत आहेत.