रायपूरजवळ दोन दुचाकींची भीषण धडक; तरुणाचा जागीच मृत्यू
जळगाव प्रतिनिधी
जळगाव : तालुक्यातील रायपूर गावाजवळ दोन दुचाकींचा समोरासमोर झालेल्या भीषण अपघातात एका तरुणाचा जागीच मृत्यू झाल्याची घटना घडली आहे. या प्रकरणी मंगळवार, दि. १४ ऑक्टोबर रोजी एमआयडीसी पोलिस ठाण्यात गुन्हा दाखल करण्यात आला आहे. मृत तरुणाचे नाव सुनिल भिका बनसोडे (वय ३८, रा. रायपूर कुसुंबा, ता. जळगाव) असे आहे.
सुत्रांकडून मिळालेल्या माहितीनुसार, सुनिल बनसोडे हे आपल्या कुटुंबियांसह रायपूर कुसुंबा गावात वास्तव्यास होते. ते मजुरी करून उदरनिर्वाह करत होते. १२ ऑक्टोबर रोजी रात्री सुमारास ९.३० वाजता ते सुप्रिम कॉलनी येथून दुचाकीने रायपूरकडे जात असताना, रायपूर गावाजवळ समोरून येणाऱ्या भरधाव दुचाकीने त्यांच्या वाहनाला जोरदार धडक दिली. या अपघातात सुनिल बनसोडे यांच्या डोक्याला गंभीर दुखापत होऊन त्यांचा जागीच मृत्यू झाला.
या घटनेनंतर मृताच्या पत्नी रूपाली बनसोडे यांनी एमआयडीसी पोलिस ठाण्यात फिर्याद दाखल केली आहे. त्यानुसार पोलिसांनी दुसऱ्या दुचाकीस्वार विलास सुधाकर कोळी (रा. कुसुंबा, ता. जळगाव) याच्याविरुद्ध गुन्हा दाखल केला आहे. पुढील तपास पोहेकॉ चंद्रकांत पाटील करीत आहेत.
