नशिराबादजवळ दुचाकी–ट्रॅव्हल्सची भीषण धडक ; तरुणाचा मृत्यू
नशिराबाद प्रतिनिधी नशिराबादजवळील सावन हॉटेलसमोर आज मंगळवार, दि. १६ रोजी सकाळी सुमारे दहा वाजेच्या सुमारास दुचाकी आणि खासगी ट्रॅव्हल्स यांच्यात झालेल्या भीषण अपघातात दुचाकीस्वार तरुणाचा मृत्यू झाल्याची घटना घडली. या अपघातामुळे काही काळ परिसरात वाहतूक कोंडी निर्माण झाली होती.
पोलिसांनी दिलेल्या माहितीनुसार, अंकुश गोकुळ चव्हाण (वय २२, रा. मीठापुर, ता. बऱ्हाणपूर, जि. बऱ्हाणपूर – मध्य प्रदेश) हा तरुण सध्या कामानिमित्त जळगाव तालुक्यातील रायपूर–कुसुंबा येथे आपल्या आतेभावाकडे वास्तव्यास होता. आज सकाळी तो दुचाकी (एमएच-१९ ईएल-४४६०) ने जळगावकडून नशिराबादच्या दिशेने सर्व्हिस रोडने जात होता.
दरम्यान, सावन हॉटेलजवळ सर्व्हिस रोडवरून मुख्य रस्त्यावर दुचाकी घेत असताना भुसावळहून जळगावकडे जाणारी एम.एस.टी. खासगी कंपनीची ट्रॅव्हल्स (एमपी-६९ पी-०१८५) समोर आल्याने दोन्ही वाहनांमध्ये जोरदार धडक झाली. धडक इतकी तीव्र होती की दुचाकी ट्रॅव्हल्सच्या समोरील भागाखाली अडकली. यामध्ये अंकुश चव्हाण गंभीर जखमी झाला.
अपघाताची माहिती मिळताच नागरिकांनी घटनास्थळी गर्दी केली. जखमी अंकुश याला तातडीने उपचारासाठी जळगाव येथील रुग्णालयात दाखल करण्यात आले; मात्र डॉक्टरांनी तपासणीनंतर त्याला मृत घोषित केले. या अपघातात भुसावळकडून जळगावकडे येणारी एक कार (एमएच-२८ बीक्यू-६४५५) नियंत्रण सुटून रस्त्याच्या कडेला जाऊन थांबली. या कारचे चालक आदित्य प्रकाश लोखंडे यांना किरकोळ दुखापत झाली असून, त्यांच्यावर प्राथमिक उपचार करण्यात आले.
दरम्यान, संबंधित ट्रॅव्हल्समध्ये दोन प्रवासी प्रवास करत असल्याची माहिती असून, ते सुखरूप असल्याचे समजते. घटनेची नोंद नशिराबाद पोलीस ठाण्यात करण्यात येत असून, पुढील तपास सुरू आहे.

