पाचोरा येथून परतत असताना रेल्वेतून पडून तरुण ठार
जळगाव प्रतिनिधी पाचोरा येथील हातमजुरीचे काम संपवून घरी परतत असताना रेल्वेतून पडल्याने मोहसीन खान मन्सूरखान सिकलगर (वय ३७, रा. कासमवाडी, जळगाव) यांचा दुर्दैवी मृत्यू झाला. ही घटना गुरुवारी, २ ऑक्टोबर रोजी रात्री ९:३० वाजेच्या सुमारास माहेजी गावाजवळ घडली. या प्रकरणी जळगाव रेल्वे पोलीस ठाण्यात अकस्मात मृत्यूची नोंद करण्यात आली आहे.
मोहसीन खान हे गुरुवारी सकाळी हातमजुरीचे काम करण्यासाठी पाचोरा येथे गेले होते. काम संपल्यावर ते रात्री रेल्वेने जळगावला परतत होते. माहेजी गावाजवळ रेल्वेतून खाली पडल्याने त्यांचा अपघात झाला. दुसऱ्या रेल्वेच्या चालकाला ही बाब लक्षात येताच त्यांनी तात्काळ स्थानक प्रमुखांना माहिती दिली. माहिती मिळताच रेल्वे पोलिस घटनास्थळी धावले आणि शोधकार्य सुरू केले.
पोलिसांना मृतदेहाच्या खिशात रेल्वेचे तिकीट, मोबाइल आणि चार्जर सापडले. ओळख पटवण्यासाठी पोलिसांनी मोबाइलमधील शेवटच्या डायल केलेल्या क्रमांकावर संपर्क साधला. तो क्रमांक पाचोरा येथील त्यांच्या कामाच्या ठिकाणच्या व्यक्तीचा असल्याचे निष्पन्न झाले. या व्यक्तीनेच पुढे मोहसीन यांच्या नातेवाईकांना घटनेची दुखद वार्ता कळवली. कुटुंबीयांना धक्का बसला असून, मृतदेह शवविच्छेदनासाठी साठी शासकीय वैद्यकीय महाविद्यालयात पाठवण्यात आला आहे.
जळगाव रेल्वे पोलिसांनी घटनास्थळाची पाहणी करून अकस्मात मृत्यूची नोंद केली आहे.
