खामखेडा येथे दुचाकीच्या धडकेत ५० वर्षीय इसमाचा जागीच मृत्यू
मुक्ताईनगर प्रतिनिधी :-मुक्ताईनगर तालुक्यातील खामखेडा येथील बुऱ्हानपूर रोडवर झालेल्या भीषण अपघातात ५० वर्षीय इसमाचा जागीच मृत्यू झाला आहे. हा अपघात मंगळवार, दिनांक २ सप्टेंबर रोजी रात्री साडेसातच्या सुमारास घडला.
मयत राजू रामभाऊ वाघ (वय ५०, रा. खामखेडा) हे रात्री खामखेडा येथील बस स्टॉपजवळ रस्ता ओलांडत होते. त्याचवेळी बाळू बुधा भोई (वय २८, रा. मेळसांगवे) यांच्या ताब्यातील काळ्या रंगाच्या बजाज पल्सर (क्र. एमएच १९ ईएन ६६३०) या दुचाकीने जोरदार धडक दिली. अचानक झालेल्या या धडकेत राजू वाघ यांच्या डोक्याला गंभीर मार लागून त्यांचा जागीच मृत्यू झाला.
या अपघातानंतर परिसरात मोठी गर्दी जमली. घटनास्थळावरून नागरिकांनी तात्काळ पोलिसांना माहिती दिली. दरम्यान, अपघातग्रस्त राजू वाघ यांना वाचवण्याचा प्रयत्न करण्यात आला, मात्र ते मृत अवस्थेत असल्याचे डॉक्टरांनी घोषित केले.
या प्रकरणी अरुण रामभाऊ वाघ (रा. खामखेडा) यांनी मुक्ताईनगर पोलीस ठाण्यात फिर्याद दिली असून, पोलिसांनी रात्री उशिरापर्यंत गुन्हा दाखल केला आहे. पुढील तपास पोलीस निरीक्षक आशिष अडसूळ यांच्या मार्गदर्शनाखाली पोलीस नाईक पवन सपकाळ करीत आहे.
