पाचोरा, लोकशाही न्यूज नेटवर्क
पाचोरा तालुक्यातील खडकदेवळा शिवारात लागलेल्या आगीत शेतातील सुबाभूळची सुमारे २४० झाडे जळून खाक झाल्याची घटना समोर आली आहे. याप्रकरणी पाचोरा पोलीस ठाण्यात आकस्मिक आगीची नोंद करण्यात आली आहे. मिळालेल्या माहितीनुसार, खडकदेवळा येथे शांताबाई ब्राम्हणे यांचे गट क्रमांक २८९ / २ मधील शेतात १६ जून रोजी दुपारी ३ ते ४ वाजेच्या सुमारास आग लागली. या आगीत सुमारे सात वर्षे वयाची सुबाभुळची २४० झाडे पूर्णपणे जळून नष्ट झाली.
या नुकसानीची अंदाजित किंमत सुमारे २ लाख रुपये असल्याचे नमूद करण्यात आले आहे. घटनेची माहिती मिळताच पाचोरा पोलीस ठाण्याचे कर्मचारी घटनास्थळी दाखल झाले. पंचनामा करून पुढील तपास सुरू असून आगीचे नेमके कारण अद्याप स्पष्ट झालेले नाही. अॅड. रविंद्र ब्राह्मणे यांच्या खबरीवरुन पाचोरा पोलिस स्टेशनमध्ये अकस्मात आगीची नोंद करण्यात आली असुन पुढील तपास पो. काॅ. कमलेश पाटील हे करीत आहे.
