लोकशाही न्यूज नेटवर्क
हिमाचल प्रदेशमध्ये भयंकर अपघात झाला. या अपघातामध्ये एकाच कुटुंबातील ६ जणांसह ७ जणांचा मृत्यू झाला. हिमाचल प्रदेशच्या चंबा जिल्ह्यामध्ये भरधाव कार दरीत कोसळून हा अपघात झाला. या अपघातामध्ये ४ पुरूष आणि ३ महिलांचा मृत्यू झाला. या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, गुरूवारी पहाटे पुखरी-मसरुंद रस्त्यावर मनी झिरोजवळ भरधाव कार अनियंत्रित होऊन ५०० फूट खोल दरीत कोसळली. हा अपघात इतका भीषण होता की कारमधील ७ जणांचा जागीच मृत्यू झाला. यामध्ये एकाच कुटुंबातील ६ जणांचा समावेश आहे. अपघातामध्ये कारचा चक्काचूर झाला. हे सर्वजण मुंडन समारंभामध्ये सहभागी झाल्यानंतर घराकडे परत जात असताना ही घटना घडली.
या अपघातामध्ये चुन्नी लाल (६५ वर्षे), देवी लाल (६२ वर्षे), बबली देवी (४५ वर्षे), मोती राम (५० वर्षे), अनिता कुमारी (२० वर्षे), कुंता देवी (५३ वर्षे) आणि मनोहर लाल (३४ वर्षे) या सात जणांचा मृत्यू झाला. चुन्नीलाल, देवीलाल आणि मोतीराम हे सख्खे भाऊ होते. चालकाचे कारवरील नियंत्रण सुटल्यामुळे हा अपघात झाला. कार थेट दरीत कोसळली. या अपघाताचा तपास पोलिस करत आहेत.
कुठेड पंचायतीचा भाग असलेल्या महाल गावातील रहिवासी मुंडन सोहळ्याला हजेरी लावून घरी परतत असताना हा अपघात घडला. हे कुटुंब आणि गावकरी काकाडोथा गावात आयोजित एका धार्मिक सोहळ्याला उपस्थित राहिले होते आणि रात्री उशिरा सोहळ्यावरून परतत असताना भीषण अपघात झाला. या घटनेमुळे महाल गाव आणि आसपासच्या परिसरात शोककळा पसरली आहे. एकाच वेळी ७ जणांच्या मृत्यूमुळे परिसरात शोककळा पसरली आहे.
