लोकशाही न्यूज नेटवर्क
ज्येष्ठ पटकथा लेखक आणि अभिनेता सलमान खानचे वडील सलीम खान यांना प्रकृती अस्वास्थ्यामुळे मंगळवारी मुंबईतील लीलावती रुग्णालयात दाखल करण्यात आलं होतं. सध्या त्यांच्यावर आयसीयूमध्ये उपचार सुरू आहेत. 90 वर्षीय सलीम खान यांचा रक्तदाब अचानक वाढला होता, त्यामुळे मेंदूच्या उजव्या बाजूला अंतर्गत रक्तस्त्राव झाला. या कारणास्तव त्यांना व्हेंटिलेटरवर ठेवण्यात आलं आहे. त्यांच्यावर बुधवारी सकाळी शस्त्रक्रिया पार पडली. त्यानंतर त्यांची प्रकृती स्थिर असल्याची माहिती डॉ. जलील पारकर यांनी दिली आहे. वडिलांना रुग्णालयात दाखल करताच सलमान खान लिलावतीमध्ये त्यांच्या भेटीला पोहोचला होता. मंगळवारी रात्री त्याला रुग्णालयातून बाहेर पडताना पाहिलं गेलं. हा व्हिडीओ पापाराझींनी सोशल मीडियावर पोस्ट केला असून त्यामध्ये सलमानच्या चेहऱ्यावरील चिंता स्पष्ट दिसत होती.
सलीम खान यांची भेट घेऊन तो रुग्णालयाबाहेर पडताना पापाराझींनी सलमानला घेरलं. पापाराझी, फोटोग्राफर आणि सुरक्षारक्षक यांच्या गोंधळादरम्यान सलमान खूपच शांत होतं. परंतु त्याच्या चेहऱ्यावर काळजी, चिंता दिसून येत होती. व्हायरल व्हिडीओमध्ये सलमान त्याच्या कारमध्ये डोळे बंद करून शांतपणे बसल्याचं पहायला मिळालं. जणू काही तो देवाकडे प्रार्थना करत होता, असं वाटत होतं. आणखी एका व्हिडीओमध्ये तो अत्यंत शांतपणे रुग्णालयातून बाहेर येताना दिसला. मंगळवारी सकाळी सलीम खान यांची अचानक प्रकृती बिघडली होती. त्यांचे कौटुंबिक डॉक्टर संदीप चोप्रा यांनी त्यांना लिलावती रुग्णालयातील आयसीयूमध्ये आणलं होतं.
दरम्यान मंगळवारी संध्याकाळी रुग्णालयाने मेडिकल बुलेटिन जारी करत सलीम खान यांची प्रकृती स्थिर असल्याचं स्पष्ट केलं. ते सध्या डॉक्टरांच्या निरीक्षणाखाली आहेत. टीममध्ये न्यूरोलॉजिस्ट डॉ. विनय चव्हाण, कार्डिओलॉजिस्ट डॉ. अजित मेनन, न्यूरोसर्जन डॉ. नितीन डांगे आणि डॉ. बिनीत अहलुवालिया यांचा समावेश असल्याची माहिती डॉ. जलील पारकर यांनी दिली. सलमानसोबतच सलीम खान यांची पहिली पत्नी सलमा आणि दुसरी पत्नी हेलनदेखील रुग्णालयात पोहोचले होते. सोबत मुलगा अरबाज खान, मुली अलविरा आणि अर्पिता खान, जावई आयुष शर्मा, नातू निर्वाण आणि अरहान हे सर्वजण रुग्णालयात त्यांच्यासोबत होते. संजय दत्तसुद्धा रुग्णालयात पोहोचला होता.
