भातखंडे, लोकशाही न्यूज नेटवर्क
अंतुर्ली बुद्रुक शिवारात दिवसाढवळ्या बिबट्याचे दर्शन झाल्याने परिसरातील शेतकरी व ग्रामस्थांमध्ये भीतीचे वातावरण निर्माण झाले आहे. गट क्रमांक २२६ (हर्षल रवींद्र समदाणी) आणि गट क्रमांक १२६/२ (निंबा दगा पाटील) यांच्या शेतशिवारात ही घटना घडली.
मिळालेल्या माहितीनुसार, ज्येष्ठ शेतकरी निंबा दगा पाटील यांचे तरुण शेतकरी राहुल निंबा पाटील हे बैलगाडीने शेताकडे जात असताना अचानक बिबट्या त्यांच्या दिशेने धावत आला. प्रसंगावधान राखत राहुल पाटील यांनी तातडीने बैलगाडीवर चढून मोठ्याने आरडाओरड केली. बैलांच्या हालचाली आणि राहुल पाटील यांच्या आरडाओरडीमुळे बिबट्या काही मिनिटांतच तेथून पळून जाऊन शिवारातील झुडपांमध्ये पसार झाला.
दिवसा बिबट्याने थेट अंगावर धावून आल्याच्या या घटनेमुळे शेतकऱ्यांमध्ये भीतीचे वातावरण आहे. शेतात काम करणाऱ्या शेतकरी व मजुरांच्या सुरक्षिततेचा प्रश्न निर्माण झाला असून, वन विभागाने तातडीने घटनास्थळी पाहणी करून आवश्यक उपाययोजना कराव्यात, अशी मागणी ग्रामस्थांकडून करण्यात येत आहे.
बिबट्याचा वावर लक्षात घेता वन विभागाने तात्काळ पिंजरा लावून त्याचा बंदोबस्त करावा, तसेच शेतकऱ्यांना सतर्कतेच्या सूचना द्याव्यात, अशी मागणी भातखंडे बुद्रुक व अंतुर्ली बुद्रुक येथील शेतकरी आणि ग्रामस्थांनी केली आहे.
