चंद्रपूर, लोकशाही न्यूज नेटवर्क
आदिवासी विकास विभाग, नागपूर अंतर्गत एकात्मिक आदिवासी विकास प्रकल्प, चंद्रपूर यांच्या वतीने प्रकल्प कार्यक्षेत्रातील सर्व शासकीय व अनुदानित आश्रमशाळांमध्ये मंगळवार, ३० जून २०२६ रोजी प्रवेशोत्सव उत्साहात साजरा करण्यात येणार आहे. नवीन शैक्षणिक वर्षाच्या प्रारंभी विद्यार्थ्यांमध्ये शिक्षणाविषयी आत्मीयता व आनंदाचे वातावरण निर्माण करण्यासाठी हा उपक्रम आयोजित करण्यात आला आहे.
प्रवेशोत्सवानिमित्त नव्याने प्रवेश घेतलेल्या विद्यार्थ्यांचे औक्षण करून त्यांचे शाळेत स्वागत करण्यात येणार आहे. तसेच विद्यार्थ्यांना पाठ्यपुस्तके, वह्या, पेन, पेन्सिल आदी शैक्षणिक साहित्याचे वाटप केले जाणार आहे. विद्यार्थ्यांना पहिल्याच दिवशी शाळेविषयी आपलेपणाची भावना निर्माण व्हावी, हा या उपक्रमामागील मुख्य उद्देश आहे.
या दरम्यान प्रकल्पांतर्गत आश्रमशाळांमध्ये नियमित शिक्षणाबरोबरच अभ्यास सत्रे, उन्हाळी शिबिरे, बालक वर्ग, ब्रिज कोर्स, जेईई/नीट प्रवेश परीक्षा मार्गदर्शन, मिशन शिक्षण, शिक्षण पेटी, भारत स्काउट अँड गाईड तसेच महाराष्ट्र इंटरनॅशनल एज्युकेशन मिशनसारखे विविध शैक्षणिक व व्यक्तिमत्त्व विकासाचे उपक्रम राबविण्यात येत असल्याची माहिती प्रशासनाने दिली.
प्रत्येक आश्रमशाळेत लोकप्रतिनिधी, ग्रामपंचायत पदाधिकारी, शाळा व्यवस्थापन समितीचे सदस्य, पालक, आदिवासी सेवक व मान्यवरांच्या उपस्थितीत प्रवेशोत्सव साजरा होणार असून, नव्या विद्यार्थ्यांच्या पालकांचेही स्वागत व सत्कार करण्यात येणार आहे. विद्यार्थ्यांच्या शिक्षणात पालकांचा सक्रिय सहभाग वाढावा, यासाठी विशेष जनजागृतीही करण्यात येणार आहे.
या कार्यक्रमास प्रकल्प अधिकारी विकास एस. राजलवार तसेच उपायुक्त तथा प्रमुख पाहुणे मा. प्रिती बनसोड उपस्थित राहणार असून, त्यांच्या हस्ते प्रवेशोत्सवाचा शुभारंभ होणार आहे. या प्रसंगी प्रकल्प अधिकारी विकास एस. राजलवार यांनी सर्व पालक, ग्रामस्थ व लोकप्रतिनिधींनी मोठ्या संख्येने उपस्थित राहून विद्यार्थ्यांचा उत्साह वाढवावा आणि शिक्षणाच्या या पवित्र उपक्रमात सहभागी व्हावे, असे आवाहन केले आहे.
