किनगाव ता. यावल
यावल तालुक्यातील चुंचाळे गायरान येथील आदिवासी वस्तीवर दुर्दैवी घटना घडली. पाच महिन्यांची गर्भवती असलेल्या २६ वर्षीय महिलेचा अचानक चक्कर येऊन कोसळल्यानंतर मृत्यू झाल्याने परिसरात हळहळ व्यक्त होत आहे.
सुरेखा दिनेश बारेला (वय २६) या चुंचाळे गावापासून सातपुड्याच्या पायथ्याशी असलेल्या गायरान परिसरातील आदिवासी वस्तीत कुटुंबासह राहत होत्या. त्या पाच महिन्यांच्या गर्भवती होत्या. गेल्या दोन दिवसांपासून त्यांना त्रास जाणवत होता. शनिवारी रात्रीही त्रास होत असल्याने रविवारी सकाळी रुग्णालयात जाण्याचा निर्णय कुटुंबीयांनी घेतला होता.
मात्र, रविवारी सकाळी आठ वाजेच्या सुमारास त्यांना अचानक चक्कर आली आणि त्या घरातच जमिनीवर कोसळून बेशुद्ध पडल्या. कुटुंबीयांनी त्यांना तातडीने यावल ग्रामीण रुग्णालयात दाखल केले. तेथे वैद्यकीय अधिकारी डॉ. तुषार सोनवणे यांनी तपासणी करून त्यांना मृत घोषित केले.
याप्रकरणी दिनेश मोहन बारेला यांनी दिलेल्या खबरीवरून यावल पोलीस ठाण्यात अकस्मात मृत्यूची नोंद करण्यात आली आहे. मृत्यूचे नेमके कारण स्पष्ट होण्यासाठी जळगाव येथील शासकीय वैद्यकीय महाविद्यालय व रुग्णालयात शवविच्छेदन करण्यात आले.
पोलीस निरीक्षक रंगनाथ धारबळे यांच्या मार्गदर्शनाखाली पोलीस हवालदार संदीप सूर्यवंशी पुढील तपास करीत आहेत. पाच महिन्यांच्या गर्भवती महिलेचा अशा प्रकारे दुर्दैवी मृत्यू झाल्याने चुंचाळे गायरान परिसरात शोककळा पसरली असून, सर्वत्र हळहळ व्यक्त होत आहे.

