|| लोकशाही न्यूज नेटवर्क ||
पाचोरा तालुक्यातील वाणेगाव शेतशिवारात आगे मोहळच्या हल्ल्यात १२ शेतमजुर जखमी झाल्याची घटना १२ एप्रिल रोजी सकाळी ८ वाजेच्या सुमारास घडली. जखमींना तातडीने पाचोरा ग्रामीण रुग्णालयात दाखल करण्यात आले. या घटनेत कुठलीही जीवीतहानी झाली नसली तरी शेतमजुर प्रचंड भितीच्या वातावरणात होते.
पाचोरा तालुक्यातील वाणेगाव येथील अरुण (भोला) आप्पा पाटील यांच्या शेतात १२ एप्रिल रोजी सकाळी ८ वाजेच्या सुमारास ज्वारी कापणीसाठी शेतमजुर गेले होते. दरम्यान शेताच्या बांधावर असलेल्या झाडावरील फांदीवर मोकाट वानराने उडी मारताच झाडाची फांदी तुटली व त्याच फांदीवर मधमाशांचे पोळ होत. फांदी तुटताच मधमाशांनी नजीकच असलेल्या शेतमजुरांवर हल्ला चढविला.
यात अनुसयाबाई ताराचंद राठोड (वय – ६०), गोपाल शामा राठोड (वय – १७), अर्जुन मोतीलाल चव्हाण (वय – १८), रेखाबाई शाम राठोड (वय – ३५), ईश्वर जगन राठोड (वय – ३२), रेणुका कैलास राठोड (वय – ३४), संगिता जयराम चव्हाण (वय – ४५), रेखाबाई युवराज पवार (वय – ५५), करण मोतीराम चव्हाण (वय – १९), दिपक विष्णु राठोड (वय – २०), रेवाबाई मोतीराम चव्हाण (वय – ३०), भोला लाला राठोड (वय – २१) हे जखमी झाले. घटनेची माहिती मिळताच मनिष देवरे यांनी जखमींना पिक अप मधुन पाचोरा ग्रामीण रुग्णालयात दाखल केले.
वैद्यकीय अधिकारी डॉ. अमित साळुंखे यांनी तातडीने जखमींवर उपचार सुरू केले. त्यांना परिचारिका दर्शना धनगर, पुनम वावरे, १०८ रुग्णवाहिका पायलट मनोज पाटील, शिपाई दिपक मोरे यांनी सहकार्य केले. जखमींना इन्जेक्शन व आय. व्ही. तातडीने देण्यात आली. दुपारनंतर सर्व जखमींच्या प्रकृतीत सुधारणा झाल्यानंतर त्यांना डिस्चार्ज देण्यात आला.
