मुंबई :
नायर रुग्णालयातील डॉ. पायल तडवीचं रॅगिंग करून तिला आत्महत्येस प्रवृत्त केल्याप्रकरणी अटक करण्यात आलेल्या तिन्ही महिला डॉक्टरांना मुंबईतील विशेष न्यायालयाने ३१ मे पर्यंत पोलीस कोठडी सुनावली आहे.
पायल तडवी आत्महत्येप्रकरणी डॉ. भक्ती मेहर, डॉ. हेमा आहुजा आणि डॉ. अंकिता खंडेलवाल या तिघींना अटक करण्यात आली आहे. तिघींनाही आज विशेष न्यायालयाचे अतिरिक्त सत्र न्यायाधीश आर. एम. सदरानी यांच्यासमोर हजर करण्यात आले होते. पायलने लिहून ठेवलेली सुसाइड नोट हा या घटनेतील महत्त्वाचा पुरावा असून हा पुरावा या तिघींनी नष्ट केल्याचा संशय आहे. त्याबाबत चौकशी करण्यासाठी तिघींनाही पोलीस कोठडी देण्यात यावी, अशी मागणी पोलिसांच्या वतीने करण्यात न्यायालयात आली. ही मागणी मान्य करत न्यायालयाने तिघींनाही ३१ मे पर्यंत पोलीस कोठडी सुनावली.
दरम्यान, २६ वर्षीय पायल तडवीने नायर रुग्णालयाच्या हॉस्टेलमध्ये गळफास घेऊन आत्महत्या केली होती. वरिष्ठ सहकारी डॉक्टरांकडून होणाऱ्या रॅगिंगला कंटाळून तिने आत्महत्या केल्याचे समोर आले होते. त्यावरून अॅट्रॉसिटीविरोधी कायदा, रॅगिंगविरोधी कायदा तसेच आत्महत्येस प्रवृत्त केल्याप्रकरणी तीन महिला डॉक्टरांवर गुन्हा दाखल करण्यात आला होता. घटनेनंतर फरार झालेल्या या तिघींनाही पोलिसांनी सहा दिवसांनंतर अटक केली आहे.
