जळगाव :- आगामी लोकसभा निवडणुकीसाठी राष्ट्रवादी काँग्रेसकडून माजी पालकमंत्री गुलाबराव देवकर यांच्या नावावर शिक्कामोर्तब करण्यात आला आहे. देवकर यांना राष्ट्रवादी पक्षश्रेष्ठीकडून कामाला लागण्याच्या सूचना मिळाल्यानंतर देवकर यांनी कामाला सुरुवात केली आहे. त्यांची जळगाव लोकसभा मतदारसंघातून उमेदवारी फायनल केली आहे.
आगामी लोकसभा निवडणुकीचे वारे वाहू लागतांनाच एकमेकांना पाण्यात पाहणाऱ्या शिवसेना आणि भाजपने सोमवारी युतीची घोषणा केल्यानंतर राष्ट्रवादीच्या पक्षश्रेष्ठीनी गुलाबराव देवकर यांना फोन करुन तुमची उमेदवारी फायनल झाली आहे, तुम्ही कामाला लागा अशा सूचना दिल्या आहेत. त्यामुळे गुलाबराव देवकर यांनी जळगाव लोकसभा मतदारसंघातून निवडणूक लढविण्याच्या तयारीला सुरुवात केली आहे.
गेल्या अनेक दिवसापासून राष्ट्रवादीकडून लोकसभेच्या उमेदवारीसाठी गुलाबराव देवकर यांना आग्रह करण्यात येत होता, उमेदवारी साठी इच्छुक नसल्याचे त्यांनी अनेक वेळा पक्ष नेतृत्वाला नकार दिला होता. मात्र, राष्ट्रवादी कडून जाहीर झालेल्या यादीत देवकरांचे नाव पुढे करण्यात आल्याने त्यांच्या उमेदवारी साठी खुद्द पक्षाचे अध्यक्ष शरद पवार यांनी पुढाकार घेतला आहे.
