नवी दिल्ली : नवीन बाईक खरेदी करणार असाल तर तुमच्यासाठी आनंदाची बातमी आहे. देशातील तिसरी सर्वात मोठी दुचाकी निर्माता कंपनी ‘बजाज’ ऑटोने (Bajaj Auto) बाइकच्या किंमतीत कपात केली आहे. किंमतीतील ही कपात सणांचा काळ लक्षात घेता करण्यात आली आहे. याशिवाय कंपनीकडून बाइक खरेदीवर ५ फ्री सर्व्हिस आणि ५ वर्षांची वॉरंटीही देण्यात येत आहे.
८ ऑक्टोबरपर्यंत ऑफर सुरु
ही ऑफर झिरो प्रोसेसिंग फीसह ८ ऑक्टोबर २०१९ पर्यंत वैध आहे. कंपनीची ‘सीटी ११०’ (CT110), ‘प्लेटिना’, ‘पल्सर १५०’, ‘पल्सर २२०F’, ‘डोमिनार ४००’ आणि ‘ऍव्हेंजर’च्या सर्व मॉडेल्सवर ऑफर उपलब्ध असणार आहे.
‘CT110’ वर ३ हजार २०० रुपयांची सूट देण्यात येत आहे. ‘डोमिनार’वर ७ हजार २०० रुपयांची सूट आहे. बजाजची बेस्ट सेलिंग बाइक ‘पल्सर १५०’वर ४ हजार २०० रुपयांची ऑफर, तर ‘पल्सर २२०’वर ५ हजार रुपयांची ऑफर देण्यात येत आहे.
‘बजाज’नंतर ‘हीरो’कडूनही डिस्काउंट जाहीर होण्याची शक्यता असल्याचे बोलले जात आहे.
पियागो ऑफर
इटालियन बाइक ब्रँड ‘पियागो’कडून वेस्पा आणि ‘अप्रेलिया’ टू-व्हिलरवर १० हजार रुपयांपर्यंतच्या डिस्काउंटची घोषणा करण्यात आली आहे. त्याशिवाय कंपनीकडून ५ वर्षांची वॉरंटी आणि इन्श्युरन्स ऑफर करण्यात येत आहे. ‘अप्रेलिया’चे बाजारात SR 125, SR 150 आणि SR 150 मॉडेल्स आहेत.
