मुंबई : जागतिक बाजारातील कच्च्या तेलातील तेजीचा वाढता दबाव लक्षात घेत पेट्रोलियम कंपन्यांनी अखेर दरवाढीचा निर्णय घेतला. आज बुधवारी देशभरातील प्रमुख शहरात पेट्रोल आणि डिझेल दरात वाढ झाली.
आज पेट्रोल २६ पैशांनी महागले तर डिझेल दरात २५ पैसे वाढ झाली आहे. आजच्या दरवाढीने मुंबईत पेट्रोल ९०.६० रुपये झाले आहे. तर एक लीटर डिझेलसाठी ग्राहकांना ८०.७८ रुपये मोजावे लागतील.
दिल्लीत आजचा पेट्रोलचा भाव ८३.९७ रुपये झाला आहे. डिझेलचा भाव ७४.१२ रुपये आहे. त्याशिवाय चेन्नईत देखील आज पेट्रोलचा भाव ८६.७५ रुपये असून डिझेल ७९.४६ रुपये आहे. कोलकात्यात एक लिटर पेट्रोलचा भाव ८५.४४ रुपये असून डिझेल ७७.७० रुपये आहे. बंगळुरात आज एक लीटर पेट्रोलचा भाव ८६.७९ रुपये असून डिझेलचा भाव ७८.५९ रुपये आहे.
कंपन्यांनी सलग २९ दिवस इंधन दर स्थिर ठेवले. याआधी सप्टेंबर आणि ऑक्टोबर या दोन महिन्यात तब्बल ४८ दिवस इंधन दर स्थिर ठेवले होते. त्यानंतर २० नोव्हेंबरपासून १५ वेळा इंधन दरवाढ झाली. ज्यात पेट्रोल २.५५ रुपयांनी महागले. तर याच कालावधी १२ वेळा डिझेल दरवाढ झाली. ज्यात डिझेलचा भाव ३.४१ रुपयांनी वधारला.
आज सिंगापूरमध्ये कच्च्या तेलाच्या किमतीत तेजी दिसून आली आहे. डब्ल्यूटीआय क्रूडचा भाव प्रती बॅरल ०.०६ डॉलरने वधारला आणि ४९.८४ डॉलर झाला. ब्रेंट क्रूडचा भाव २.५१ डॉलरने वाढला असून तो ५३.६० डॉलर झाला आहे. तेलाच्या दरात ४.९१ टक्के वाढ झाली आहे.
दरम्यान, अमेरिकेतील तेल साठा १ जानेवारीच्या आठवड्यात १.२७ दशलक्ष बॅरल इतका आहे. त्याआधीच्या आठवड्यात तो ४.७८ दशलक्ष डॉलर होता. मागील काही आठवडे तेलाची मागणी वाढत असल्याचे दिसून आले आहे. त्यामुळे तेलाच्या दरात तेजी असल्याचे विश्लेषकांचे म्हणणे आहे. मात्र नव्या करोना व्हायरसने युरोपात आणीबाणीची स्थिती निर्माण झाली आहे. ब्रिटनने लॉकडाउन जाहीर केला असून त्यामुळे कच्च्या तेलाच्या मागणीवर परिणाम होण्याची शक्यता आहे.
