फैजपूर, लोकशाही न्यूज नेटवर्क
सावदा येथील विनापरवानगी बायोडिझेल विक्री कोणाच्या आशीर्वादाने सुरू होती? संबंधितांकडे बायोडिझेल विक्रीचा कोणताही परवाना नसतानांही विक्री कशी सुरू होती? असे अनेक प्रश्न उपस्थित करत या प्रकरणी रावेर तहसीलदारांच्या कार्यपद्धतीवर आमदार चंद्रकांत पाटील यांनी उघड नाराजी व्यक्त केली.
फैजपूर प्रांताधिकारी कैलास कडलग यांची भेट घेऊन आ. पाटील यांनी याबाबत नाराजी व्यक्त केली. यात कोणी अधिकारी दोषी असेल त्यांची मी स्वतः तक्रार करणार आहे. त्यामुळे बायोडिझेल विक्रीसाठी कोठून उपलब्ध होते, याबाबत महसूल अधिकारी यांनी याचा तपास केला का? तसेच पोलिस प्रशासन यांना कारवाई साठी पत्र अथवा गुन्हा का दाखल केला नाही? असे अनेक सवाल उपस्थित करत आमदार चंद्रकांत पाटील यांनी याप्रकरणी रावेर तहसीलदार उषाराणी देवगुणे यांच्या कार्यपद्धतीवर नाराजी व्यक्त केली.
बुधवारी एक वाजता प्रांताधिकारी कार्यालयात आमदार चंद्रकांत पाटील यांनी प्रांताधिकारी कैलास कडलग यांची भेट घेतली व बायोडिझेल विक्रीची कोणतीही परवानगी नसताना सावदा विभागात बिनधास्तपणे बायोडिझेल विक्री कोणाच्या आशीर्वादाने सुरू आहे? यात मागील एका आठवड्यात फक्त सावदा हद्दीतील बायोडिझेल पंपावर सील केले ही कारवाई रावेर तहसीलदार उषाराणी देवगुणे यांनी कारवाई केली मात्र याप्रकरणी पोलिसात फिर्याद दिली नाही किंवा बायोडिझेल पंपचे सॅम्पल घेऊन तपासणीसाठी का पाठवले नाही? त्यामुळे महसूल अधिकारी यांच्या कार्यप्रणाली वर शंका उपस्थित होत आहे. यात काही आर्थिक चिरी-मिरी तर नाही ना? असा थेट सवाल आमदार चंद्रकांत पाटील यांनी व्यक्त केला यावेळी प्रांताधिकारी कैलास कडलग यांनी दोषींवर कारवाई करण्यात येईल असे सांगितले व वस्तूनिष्ठ अहवाल मागवून योग्य ती कारवाई करण्याचे सांगितले.
याप्रसंगी शिवसेना उपजिल्हा प्रमुख गोपाळ सोनवणे, शिवसेना शहराध्यक्ष तथा नगरसेवक अमोल निंबाळे,शेख शाकिर शेख इमाम, शिवसेना उपतालुका प्रमुख राजू काठोके यांच्यासह पदाधिकारी उपस्थित होते.
तहसिलदार देवगुणे मॅडम यांची भुमिका संशयास्पद- आ. पाटील
सावदा हद्दीत विनापरवानगी सुरू असलेल्या बायोडिझेल पंपावर कारवाई केली पण पुढील रितसर पोलीस फिर्याद दिली नाही तसेच सदर बायोडिझेल पंपाचे सॅम्पल घेऊन तपासणी पाठवले नाहीत यासर्व प्रकारामुळे रावेर तहसिलदार उषाराणी देवगुणे यांची भुमिका संशयास्पद असल्याचे दिसून येत आहे.
