मुंबई :- मुंबई पुणे रेल्वे मार्गावर मालगाडीचे ५ ते ६ डबे घसरल्याची घटना आज पहाटे साडेचारच्या सुमारास जामरुंग रेल्वे स्थानकाजवळ घडली. दरम्यान, पुण्याच्या दिशेने जाणारी रेल्वे वाहतूक बंद करण्यात आली असून पुण्याहून मुंबईच्या दिशेने येणारी वाहतूक विस्कळीत झाली आहे. त्यामुळे रेल्वेने प्रवास करणाऱ्या चाकरमान्यांना त्रास सहन करावा लागत आहे. दरम्यान, डबे हटवण्याचं काम हाती घेण्यात आलं आहे. कर्जत ते लोणावळा दरम्यान असलेल्या छोट्या स्थानकादरम्यान ही घटना घडली आहे.
या गाड्या झाल्या रद्द
या घटनेमुळे मुंबईहून पुण्याला जाणाऱ्या मुंबई पुणे इंद्रायणी एक्स्प्रेस, मुंबई पुणे इंटरसिटी एक्स्प्रेस, मुंबई पुणे डेक्कन एक्स्प्रेस रद्द करण्यात आल्या आहेत. पुणे भुसावळ एक्स्प्रेस, पनवेल पुणे पॅसेंजर, पुणे सीएसएमटी डेक्कन एक्स्प्रेस, पुणे सीएसएमटी प्रगती एक्स्प्रेस या पुण्याहून सुटणाऱ्या ट्रेन्सही रद्द करण्यात आल्या आहेत. तर कोल्हापूर कोयान एक्स्प्रेसही मुंबई ते पुणे दरम्यान रद्द करण्यात आली आहे. भुसावळ पुणे एक्स्प्रेसची यात्रा नाशिक रोड स्थानकात संपवण्यात आली आहे.
लांब पल्ल्याच्या मुंबईहून पुणेमार्गे जाणाऱ्या ट्रेन्स या इगतपुरी मार्गे वळवण्यात आल्या आहेत अशी माहिती मध्य रेल्वेने ट्विटरद्वारे दिली आहे. मालगाडीचे ५ ते ६ डबे घसरल्याचीही माहिती समोर आली आहे.
