भुसावळ :- येथील मोहीत नगर भागातील रहिवासी व रेल्वेच्या साहित्य पुरवठा विभागात कार्यरत असलेल्या लिपीकाने आज दि.८ मे पहाटे पंख्याला दोरी बांधून गळफास घेतल्याची घटना सकाळी उघडकीस आल्याने शहर व परिसरात हळहळ व्यक्त होत आहे.
सन २००४ वर्षांपासून रेल्वे सुरक्षा बल मध्ये खानावळ विभागात कार्यरत व काही कारणात्सव नुकतेच मागील वर्षांपासून रेल्वे विभागात स्टोअर मध्ये लिपीक पदावर कार्यरत असलेले गौतम आनंदा शिंदे (वय ३७) हे त्यांच्या राहते घरी दि. ७ मे रोजी पहिल्या मजल्यावर झोपले होते. बुधवारी सकाळी गौतम शिंदे यांची आई त्यांना उठविण्याकरिता वरच्या मजल्यावर गेल्या असता गौतमने गळफास घेऊन आत्महत्या केल्याचे उघडकीस आले.गौतमचा मृतदेह बघताच आई परिवाराने हंबरडा फोडला . यामुळे परिसरातील नागरिक जमा झाले.दरम्यान शहर पोलीस ठाण्यात घटनेचे वृत्त समजताच घटनास्थळी पोलिसांनी धाव घेतली . घटनास्थळी बारीक दोरी व लोखंडी शिडी आढळून आली . पोलीस पंचनामा करुन जळगाव येथे शवविच्छेदन करण्यात आले.
मयत गौतम यांचा विवाह ८ वर्षांपूर्वीच झाला असून त्यांच्या पश्च्यात पत्नी,मुलगा,आई ,दोन भाऊ , तीन बहीण असा परिवार आहे. आत्महत्येचे कारण मात्र समजू शकले नाही.
दरम्यान या प्रकरणी शहर पोलीस ठाण्यात अकस्मात मृत्यूची नोंद करण्यात आली असून तपास पोलीस निरीक्षक बाळासाहेब ठोंबे यांच्या मार्गदर्शनाखाली पोलीस कर्मचारी करीत आहे.
