जळगाव, प्रतिनिधी : गेल्या काही दिवसांपासून सुरू असलेल्या कौटुंबिक वादातून गडचिरोली जिल्ह्यातील मुलचेरा येथे कार्यरत पोलीस उपनिरीक्षक धनराज बाबूलाल शिरसाठ (वय 34, मूळ राहणार मुसळी, ता. धरणगाव) याने जळगावातील लक्ष्मीनगरातील माहेरवाशिण असलेली पत्नी संगीता हिच्यावर गोळीबार केल्याची धक्कादायक घटना गुरुवारी दुपारी घडली. घरात प्रत्यक्षदर्शी असलेल्या पोलीस उपनिरीक्षकाची सात वर्षीय मुलगी भार्गवी हिने जळगावातील मामा गणेश सपके यास मोबाईलवरुन संपर्क साधला अन् रडत रडतच मामा…पप्पाने मम्मीच्या डोक्यात बंदुकीने गोळी मारल्याची माहिती दिली. त्यानंतर घटना समोर आल्याचे गणेश सपके यांनी सांगितले. या घटनेत संगीता धनराज शिरसाठ (वय 28) या गंभीर जखमी झाल्या असून, त्यांना रुग्णालयात दाखल करण्यात आल्याचे त्यांचा भाऊ गणेश याने सांगितले.
संगीता यांचा भाऊ गणेश सपके यांनी दिलेल्या माहितीनुसार, ते शहरातील लक्ष्मीनगरात राहतात. सात वर्षापूर्वी बहीण संगीताचा विवाह धरणगाव तालुक्यातील मुसळी येथील धनराज शिरसाठ यांच्याशी झाला. त्यांना सात वर्षाची मुलगी भार्गवी व चार वर्षाचा मुलगा शिवा, अशी दोन मुले आहेत. धनराज शिरसाठ हे मुंबई येथे पोलीस हवालदार होते. 2017 मध्ये त्यांनी पोलीस उपनिरीक्षकपदाची परीक्षा उत्तीर्ण केली. त्यांना पोलीस उपनिरीक्षकपदी पहिलीच नियुक्ती गडचिरोली जिल्ह्यातील मुलचेरा तालुक्यात मिळाली. त्यानुसार पत्नी व मुलासह ते मुलचेरा येथील पोलीस वसाहतीत वास्तव्यास आहेत.
वर्षभरापासून धनराज व संगीता यांच्यात वाद सुरु आहे. याबद्दल संगीता हिने जळगावात राहत असलेल्या आपल्या वडिलांना माहिती दिली. त्यानुसार वडिलांनी धनराज याच्या आई व वडिलांना मुलगा धनराज याची समजूत काढण्याचे सांगितले होते. याप्रमाणे समजूत काढण्यासाठी लॉकडाऊनपूर्वी धनराज याचे वडील बाबूलाल नामदेव शिरसाठ व आई सुशिला शिरसाठ हे मुलचेरा येथे गेले होते. या दरम्यान गुरुवारी 7 मे रोजी, दुपारी धनराज व पत्नी संगीता यांच्यात भांडण झाले. या भांडणातून धनराज याने त्याच्याजवळ असलेल्या रिव्हॉल्वरने पत्नी संगीतावर गोळीबार केला. यात एक गोळी संगीताच्या डोक्यात शिरली, तर दुसरी गोळी कानाला चाटून गेली. या प्रकारानंतर घटनेची प्रत्यक्षदर्शी असलेली संगीताची मुलगी भार्गवी हिने तिचे जळगावातील मामाला तसेच बाबा यांना मोबाईलवरुन संपर्क साधला. घटनेची माहिती दिली.
या घटनेची माहिती मिळाल्यावर जळगावातील माहेरची मंडळींनी त्यांचे मूलचेरा येथील नातेवाईकांना घरी जावून माहिती घेण्यास सांगितले. कोरोनाच्या पार्श्‍वभूमीवर लॉकडाऊन असल्याने थेट जाता येणार नाही. त्यासाठी नियमानुसार पासची आवश्यकता आहे. त्यानुसार संगीता हिचे माहेरची मंडळी संबंधित शासकीय कार्यालयात जावून मुलचेरा येथे जाण्यासाठी आवश्यक पास तयार करण्याचे काम करत होते. शेवटची वृत्त मिळाले तोवर पासेस तसेच परवानगी मिळाल्यानंतर संगीताचे कुटुंबीय मुलचेराकडे रवाना होणार आहेत.
