मुंबई | कोरोनाच्या प्रादुर्भावामुळे महाराष्ट्राची परिस्थिती सध्या अवघड बनली आहे . दिवसेंदिवस कोरोना रुग्णांचे आकडे वाढतच चालले असून कडक पावलं उचलण्याची गरज असल्याचं मुख्यमंत्री उद्धव ठाकरे यांनी बोलून दाखवलं आहे. त्यासाठी आज मंत्रिमंडळाची तातडीची बैठक बोलावली असून कोणत्याही क्षणी या बैठकीतील निर्णय जाहीर होण्याची शक्यता आहे. सध्याची स्थिती पाहता मुख्यमंत्री लॉकडाऊन लावण्यावर ठाम असल्याचं समजत आहे. नुकत्याच हाती आलेल्या माहितीनूसार सध्या राज्यात १० दिवसांचा लॉकडाऊन जाहीर केला जाऊ शकतो. मंत्रिमंडळाच्या बैठकीत सध्या या मुद्द्यांवर चर्चा सुरु आहे.
मुख्यमंत्री उद्धव ठाकरे यांनी नुकताच राज्यातील जनतेसोबत संवाद साधला होता. यावेळी त्यांनी लोकांना काळजी घेण्याचं आवाहन केलं होतं. लॉकडाऊन अपरिहार्य असल्याचं त्यांच्या बोलण्यातून यावेळी जाणवत होतं. आपण विविध क्षेत्रातील तज्ज्ञांशी बोलून लवकर यासंदर्भात निर्णय घेणार असल्याचं त्यांनी म्हटलं होतं.
दरम्यान, गेल्या दोन दिवसांपासून मुख्यमंत्री राज्यातील कोरोनाच्या परिस्थितीबाबत विविध क्षेत्रातील तज्ज्ञांशी संवाद साधत आहेत. आज मंत्रिमंडळाच्या बैठकीत यासंदर्भात अंतिम निर्णय होणार आहे. मुख्यमंत्री लॉकडाऊनवर ठाम आहेत, आता जनतेला प्रश्न इतकाच आहे की लॉकडाऊन किती दिवसांचा लागणार?
