नवी दिल्ली : पश्चिम बंगालच्या मुख्यमंत्री ममता बॅनर्जींनी मोदीविरोधी आघाडीच्या बांधणीसाठी दिल्लीत बैठकांचे सत्र सुरू केले असून ममता बॅनर्जी आज सकाळी नाश्त्याच्या वेळी शिवसेनेचे खासदार संजय राऊत यांची भेट घेतली आणि ममता बॅनर्जींच्या हालचालींविषयी सहमती दर्शवली आहे.
‘प्रादेशिक पार्टी’ फ्रंट बनवण्यासाठी ममता बॅनर्जी प्रयत्नशील असून त्या मध्यंतरी मुंबईत उद्धव ठाकरे यांनाही भेटल्या होत्या. त्यांनी ही संकल्पना उद्धव ठाकरे यांच्यापुढेही मांडली आहे. आज माझी ममता बॅनर्जी यांच्याशी त्यादृष्टीने चर्चा झाली. आणखीही काही महत्त्वाचे मुद्दे चर्चेत होते. पण राजकारणात चार भिंतीआड झालेल्या सर्वच गोष्टी उघड करायच्या नसतात, असे संजय राऊत यांनी आपल्या या भेटीबद्दल म्हटले आहे.
तसेच आमचा कर्नाटक विधानसभा निवडणूक सीमा भागात एकीकरण समितीला पाठिंबा असेल. उर्वरित कर्नाटक बाबतीत काय करायचे? याचा अंतिम निर्णय उद्धव ठाकरे यांच्याशी पक्षांतर्गत चर्चा करून लवकरच जाहीर करण्यात येईल, असेही त्यांनी यावेळी कर्नाटक विधानसभा निवडणुकीबद्दल म्हटले आहे. निवडणूक आयोगाने आजच एक पत्रकार परिषद घेऊन कर्नाटक निवडणुकीच्या तारखा जाहीर केल्या आहेत.
ममता बॅनर्जी त्यानंतर राष्ट्रवादीचे अध्यक्ष आणि माजी कृषीमंत्री शरद पवार यांनाही भेटल्या. बैठकीला माजी केंद्रीय मंत्री प्रफुल्ल पटेल हे देखील उपस्थित होते. त्यांच्यात काय चर्चा झाली? याचा तपशील मात्र उपलब्ध झालेला नाही.
