जळगाव (प्रतिनिधी): जळगाव मनपा आयुक्तपदी सतीश कुलकर्णी यांची नियुक्ती करण्यात आली असून त्यांनी आज सकाळी आपला पदभार स्वीकारला आहे. यावेळी महापौर भारती सोनवणे यांनी त्यांच्या दालनात पुष्पगूच्छ देवून स्वागत केले. यानंतर त्यांनी दालनात जावून पदभार स्विकारला.
महापालिकेचे तत्कालिन आयुक्त डॉ.उदय टेकाळे सेवानिवृत्त झाल्यामुळे जिल्हाधिकारी डॉ.अविनाश ढाकणे यांच्याकडे अतिरिक्त कार्यभार सोपविण्यात आला होता. दरम्यान, मनपाच्या रिक्त असलेल्या आयुक्त पदी नागपूर येथील वस्त्रोद्योग महामंडळाच्या संचालिका आयएएस अधिकारी माधवी खोडे-चवरे यांची आयुक्तपदी नियुक्ती करण्यात आली होती. मात्र, त्या रुजू झाल्या नाहीत. मनपात आयुक्तां अभावी अनेक प्रश्न प्रलंबित राहत असल्याने तातडीने आयुक्तांची नियुक्ती करावी अशी मागणी आमदार राजूमामा भोळे यांनी विधानसभेत केली होती. त्यामुळे दि.13 मार्च रोजी मुंबईच्या नगरपरिषद प्रशासन संचालनालयाचे उपसंचालक सतीश कुलकर्णी यांची जळगाव मनपा आयुक्तपदी नियुक्ती करुन आयुक्तपदाचा कार्यभार त्वरीत स्वीकारावा असे आदेश नगरविकास विभागाने दिले होते. त्यानुसार नवे आयुक्त सतीश कुलकर्णी यांनी आज सोमवारी आपल्या पदाचा पदभार स्वीकारला. लागलीच आयुक्त कुलकर्णी यांनी महापालिकेच्या सर्व अभियंत्यांना बोलावून कामाचा आढावा घेण्यास सुरवात केली.
