भोपाळ : मध्य प्रदेशमध्ये कमलनाथ सरकारची अग्निपरीक्षा लांबणीवर गेली आहे. कमलनाथ सरकारची फ्लोअर टेस्ट आजही होऊ शकली नाही. उलट कोरोना व्हायरसचं कारण पुढे करत 26 मार्चपर्यंत विधान सभेचं कामकाज स्थगित करण्यात आली. दरम्यान, मुख्यमंत्री कमलनाथ यांनी राज्‍यपाल लालजी टंडन यांना भले मोठं पत्र लिहिलं आहे. भाजपने काँग्रेसच्या अनेक आमदारांचे अपहरण केले आहे. आमच्या आमदारांना भाजपने वेठीस ठेवलं असल्याचा आरोप मुख्यमंत्री कमलनाथ यांनी केला आहे.
ज्योतिरादित्य शिंदे यांनी राजीनामा दिल्यानंतर त्यांच्यासह 22 आमदारांनीही राज्यपालांकडे राजीनामा सुपूर्द केला. त्यानंतर कमलनाथ सरकार कोसळेल असा अंदाज सर्व स्तरातून व्यक्त केला जात होता. कमलनाथ यांना बहुमत सिद्ध करण्यासाठी सोमवारपर्यंतची वेळ देण्यात आली होती. सोमवारी सकाळी 11 वाजता फ्लोअर टेस्ट होईल असं सांगण्यात येत होतं. मात्र विधिमंडळाकडून आलेल्या परिपत्रकानुसार त्यामध्ये प्लोअर टेस्टचा उल्लेख नसल्यानं ही चाचणी होणार की नाही याबाबत संभ्रम कायम आहे.
