नवी दिल्ली :- ऑल इंडिया पेट्रोलियम डीलर्स असोसिएशन (एआयपीडीए)ने मतदान करणाऱ्या ग्राहकांना पेट्रोल-डिझेल खरेदीवर प्रतिलिटर ५० पैशांची सूट देणार असल्याची घोषणा एआयपीडीएने केली आहे.
लोकांनी जास्तीजास्त संख्येने मतदान करावं म्हणून पहिल्यांदाच एआयपीडीए ही सवलत देणार आहे. मतदारांसाठी ही ऑफर मतदानाच्या दिवशी सकाळी ८ वाजल्यापासून रात्री ८ वाजेपर्यंत ग्राहकांना या सवलतीचा लाभ घेता येईल. त्यासाठी मतदान केल्यानंतर बोटावर मतदानाची शाई असेल केवळ त्यांनाच या सवलतीचा लाभ घेता येईल असे एआयपीडीएचे अध्यक्ष अजय बन्सल यांनी स्पष्ट केलं आहे. ही सवलत फक्त २० लिटरपर्यंतच घेता येईल. त्याहून जास्त इंधन भरल्यास ही सवलत मिळणार नाही.
११ एप्रिल ते १९ मे दरम्यान सात टप्प्यांमध्ये लोकसभा निवडणुकांसाठी मतदान होणार असून २३ मेला निकाल जाहीर करण्यात येणार आहेत.
