भारताचा दक्षिण आफ्रिकेला ‘व्हाईटवॉश’, 3-0 ने मालिका जिंकली

0

रांची: दक्षिण आफ्रिकेविरुद्धच्या कसोटी मालिकेतील तिसरा सामना भारतानं एक डाव आणि तब्बल २०२ धावांनी जिंकला आहे. आफ्रिकेविरुद्धचा हा भारताचा सलग तिसरा कसोटी विजय असून या विजयासह भारतानं ही मालिका ३-० अशा फरकानं खिशात घातली आहे. चौथ्या दिवशी ८ बाद १३२ धावांवरून डाव पुढं सुरू करणाऱ्या आफ्रिकेचा डाव भारतानं आज अवघ्या ९ मिनिटांत गुंडाळला आणि निर्विवाद विजयावर शिक्कामोर्तब केलं. दक्षिण आफ्रिकेवर भारतानं मिळवलेला हा आजवरचा सर्वात मोठा मालिका विजय आहे.

दरम्यान, या तिसऱ्या सामन्यात भारताने प्रथम फलंदाजी करण्याच निर्णय घेतला आणि ४९७ धावा केल्या. या आव्हानाचा पाठलाग करताना आफ्रिकेचा पहिला डाव १६२ धावांवर तर फॉलो-ऑन नंतरचा डाव १३३ धावांवर आटोपला. पहिल्या डावातील अपयशामुळे आफ्रिकेवर फॉलो-ऑनची नामुष्की ओढवली. त्यानंतर दुसऱ्या डावातही आफ्रिकेच्या खेळाडूंनी खराब कामगिरी केली. डी कॉक, हामझा, बावुमा, हामझा आणि क्लासें या फलंदाजांना दोन अंकी धावसंख्याही गाठता आली नाही.

सलामीवीर डीन एल्गरला चेंडू लागल्याने तो १६ धावांवर रिटायर्ड हर्ट झाला. त्याच्या जागी आलेला बदली खेळाडू डे ब्रून याने आफ्रिकेच्या तळाच्या फलंदाजांना हाताशी घेत आजचा पराभव उद्यावर ढकलला. मात्र, चौथ्या दिवसाचा खेळ सुरू झाला अणि अवघ्या काही मिनिटांमध्येच खेळ संपला. डे ब्रून (३०) आणि लुंगी एन्गीडी नदीमच्या सलग दोन चेंडूवर बाद झाले. मोहम्मद शमीने ३, उमेश यादव आणि शाहबाज नदीम २-२, तर जाडेजा व अश्विनने १-१ बळी टिपला.

 

Leave A Reply

Your email address will not be published.