पातोंडा ता. अमळनेर, लोकशाही न्यूज नेटवर्क
पातोंडा येथील न्यू प्लॉट येथील रहिवासी जवान गणेश भिमराव पाटील (वय ३६) हे सध्या जम्मू काश्मीर मधील सांबा येथे सेवेत असतांना त्याचे काल सायंकाळी आकस्मिक निधन झाल्याची माहिती मिळाली.
जवान गणेश भिमराव पाटील यांच्या निधनाची वार्ता कळताच कुटूंबांसह गाव परिसरात शोककळा पसरली आहे. गणेश हे १४ मराठा बटालियनमधे सेवेत कार्यरत होते. त्याची आतापर्यंत १६ वर्ष ९ महीने सेवा झाली असून ते येत्या डिसेंबर महिन्यात १७ वर्ष सेवा पुर्ण करून घरी परतणार होते, तितक्यात त्याच्यावर काळाने घाला घातला.
त्यांचे शव आर्मीचे सर्व शासकीय सोपस्कार पुर्ण करून विमानाने मुंबई व मुंबईहून रुग्णवाहिकेने युनिटच्या सैनिक निगराणीत पातोंडा येथे येणार आहे. त्याकरीता आवश्यक होकार त्यांची पत्नी सीमा हिने आर्मी अधिकाऱ्यांना कळवले असल्याचे समजते. गणेश यांचा अंत्यसंस्कार शक्यतोवर ७ रोजीच पातोंडा येथे सर्व शासकीय इतमामात होणार आहेत.
गणेश यांच्या पश्चात वृद्ध आई, पत्नी सीमा, दोन मुली असा परीवार आहे. शहिद गणेश यांच्यावर अंत्यसंस्कार करण्यासाठी समस्त गावातील तरुण वर्गाने पुढाकार घेतला आहे.
