चाळीसगाव | प्रतिनिधी
तालुक्यातील पाटणा अभयारण्यातून चोरलेल्या सुमारे 13.400 किलो चंदनासह एकाला मध्यरात्रीच्या सुमारास वन विभागाने ताब्यात घेतले. या जप्त केलेल्या चंदनाची किंमत 65 ते 70 हजार रूपये इतकी असून या घटनेने खळबळ उडाली आहे.
या घटनेची माहीती अशी की, पाटणा जवळील चंडीकावाडी येथील कैलास नथू चव्हाण याच्याकडे चोरीचे चंदन असल्याची माहिती पाटणा वन परिक्षेत्राचे वन परिक्षेत्र अधिकारी एम.डी. चव्हाण यांना मिळाली असता श्री. चव्हाण यांच्यासह विभागीय वन अधिकारी एस.पी. काळे, कन्नड विभागाचे आरएफओ राहूल शेळके, वनरक्षक मनिषा त्रिमाळी, शिंदे, वनमजुर कांतीलाल नागरे, नलरवडे, रामचंद्र पाटील यांच्या पथकाने काल दि.12 रोजी रात्री 12 वाजेच्या सुमारास कैलास चव्हाण याच्या घरावर छापा टाकला असता घरात साल काढलेले सुमारे 13 किलो 400 ग्रॅम वजनाचे चंदन मिळून आले. पथकाने चंदनासह कैलास चव्हाण यास ताब्यात घेतले आहे. या जप्त केलेल्या चंदनाची किंमत अंदाजे 65 ते 70 हजार रूपये इतकी असल्याची माहिती वन परिक्षेत्र अधिकारी एम डी चव्हाण यांनी दिली.
पाटणादेवी गौताळा अभयारण्य हे धार्मिक स्थळ तसेच ऐतिहासिक निसर्गरम्य पर्यटन म्हणून प्रसिद्ध आहे. या जंगलामध्ये मोठ्या प्रमाणावर वेगवेगळ्या वनस्पती व वन औषधी मुबलक प्रमाणावर आढळतात. यात चंदन देखील मोठ्या प्रमाणावर आहे. या भागात चंदन चोरीचे प्रकार अनेक वेळा उघडकीस आले आहेत. चंदनासह ताब्यात घेतलेल्या कैलास चव्हाण याने अनधिकृतरित्या पाटणा जंगलातील चंदन तोडून त्याचा आपल्या घरात साठा करून ठेवला व तो दुसरीकडे विक्री करण्याच्या तयारीत असतांनाच त्याला पकडल्याचेही माहिती वनपरिक्षेत्र अधिकारी चव्हाण यांनी दिली. या घटनेने परिसरात खळबळ उडाली आहे.
