मुंबई :- विरार परिसरात इयत्ता ९वीत शिकणाऱ्या मुलीवर झालेल्या सामूहिक बलात्काराच्या घटनेने खळबळ उडाली आहे. ही १५ वर्षीय पीडित मुलगी घटना घडली तेव्हा आपल्या मित्रासोबत होती. दोघे निर्जन स्थळी पोहोचल्याचे हेरून दोन लोकांनी तिच्या मित्रासह मुलीला झाडाला बांधले आणि तिच्यावर आळीपाळीने बलात्कार केले. यात दोन आरोपींपैकी एकजण ऑटोरिक्षा चालक असलण्याचा संशय पोलिसांनी व्यक्त केला आहे. याप्रकरणी पीडित मुलीच्या वडिलांनी विरार पोलीस ठाण्यात तक्रार दाखल केली.
या तक्रारीनुसार, ही घटना सोमवारी रात्री ८ वाजण्याच्या सुमारास घडली. त्यावेळी पीडित मुलगी आपल्या नातेवाईकांच्या घरी जात होती. त्यावेळी रस्त्यात तिचा शाळेतील मित्र (१६) तिला भेटला. त्यावेळी तिथे दोन लोक आले. त्यांपैकी एक जाड, तर दुसरा किरकोळ बांध्याचा होता. दोघांनी त्यांना शाळेच्या मागील परिसरात एका उजाड जागेवर खेचत नेले. दरम्यान पीडित मुलीचा मित्र किशोर याने पोलिसांना दिलेल्या जबाबानुसार, दोघांनी किशोरला एका झाडाला बांधले आणि आरडाओरडा केल्यास ठार मारण्यात येईल अशी धमकी दिली. त्यानंतर दोघांनी पीडित मुलीला झाडीच्या मागे नेले आणि तिथे तिच्यावर बलात्कार केले.
त्यानंतर तशाच स्थितीत सोडून आरोपी निघून गेले. पीडित मुलगी कशीबशी झाडीच्या मागून बाहेर आली. तिने झाडाला बांधून ठेवलेल्या आपल्या मित्राला सोडवले. घरी आल्यानंतर तिने आपल्या आई-वडिलांना घडलेली हकिकत सांगितली. मित्राच्या घरी घडलेला प्रकार सांगितल्यानंतर मग तिच्या कुटुंबीयांनी पोलिसात तक्रार दाखल केली.
