पुणे :- महाराष्ट्र अंधश्रद्धा निर्मूलन समितीचे कार्याध्यक्ष डॉ. नरेंद्र दाभोलकर यांच्या हत्या प्रकरणातील संशयित शरद कळसकर याची न्यायवैद्यकीय चाचणी घेण्यात आली. त्यात त्याने ‘मी आणि साथीदार सचिन अंदुरेने डॉ. दाभोलकर यांच्यावर गोळीबार केला,’ अशी माहिती केंद्रीय गुन्हे अन्वेषण विभागाला (सीबीआय) दिली. ‘सीबीआय’कडून याबाबत मंगळवारी विशेष न्यायालयात अहवाल सादर करण्यात आला.
शरद कळसकरने न्यायवैद्यकीय चाचणीत त्याचे वकील संजीव पुनाळेकर यांचे सुद्धा नाव घेतले आहे. डॉ. नरेंद्र दाभोलकर हत्या प्रकरणात वकील संजीव पुनाळेकर सुद्धा अटकेत आहेत. रविवारी पुणे न्यायालयाने संजीव पुनाळेकर यांना सहा जुलैपर्यंत न्यायालयीन कोठडी सुनावली आहे. मागच्यावर्षी जून महिन्यात मी पुनाळेकर यांची भेट घेतली होती. त्यावेळी त्यांनी मला दाभोलकर यांच्या हत्येसाठी वापरलेली शस्त्र नष्ट करण्याचा सल्ला दिला होता अशी कबुली कळसकरने न्यायवैद्यकीय चाचणीत दिला आहे. सीबीआयने २५ मे रोजी संजीव पुनाळेकर आणि विक्रम भावे यांना दाभोलकर हत्या प्रकरणात अटक केली.
