शिवाजीनगरातील चार वर्षीय बालिकेचा मृत्यू : मनपा प्रशासनाला आली जाग
जळगाव, दि.6 –
शहरातील शिवाजीनगरमधील संभाजी चौक परिसरातील प्रभात मेडीकल चौकातील रहिवाशी असलेल्या चार वर्षीय चिमुकलीचा डेंग्यूच्या आजाराने खाजगी रुग्णालयात उपचारादरम्यान मृत्यू झाल्याची दुदैवी घटना आज सकाळी 5.30 वाजेच्या सुमारास घडली. या घटनेची तात्काळ दखल घेवून मनपा प्रशासनाकडून परिसरात लागलीच अबेटींग, फवारणी व धुरळी उपाययोजना करण्यात आली.
शहरातील शिवाजीनगर परिसरातील रहिवाशी असलेले प्रशांत दशरथ पाटील यांची चार वर्षाची चिमुकली जान्हवी प्रशांत पाटील हिला दोन दिवसांपासून थंडी, ताप येत असल्याने तिच्यावर प्राथमिक उपचार सुरु होते. काल दि.5 रोजी तिची प्रकृती खराब झाल्याने तिला शहरातील एका खाजगी रुग्णालयात दाखल करण्यात आले. आज सकाळी या चिमुकलीचा उपचारादरम्यान मृत्यू झाला. दरम्यान चिमुकलीचे वडील उज्ज्वल ऑटोमोबाईल इन्शुरन्स कंपनीत तर काका न्यायालयात लिपीक असल्याचे समजते.
आ.भोळे, कैलास सोनवणेंची भेट
घटनेची माहीती मिळताच डेंग्यू निर्मुलनाची मोहीम राबविणारे माजी नगरसेवक कैलास सोनवणे यांनी शिवाजी नगरात जावून पाटील कुटुंबियांची भेट घेतली. यावेळी त्यांच्यासोबत परिसरातील भाजप नगरसेवक नवनाथ दारकुंडे, गायत्री शिंदे, किशोर बाविस्कर हे देखिल उपस्थित होते. यावेळी सोनवणे यांनी तात्काळ या ठिकाणी महापालिका मलेरिया विभागाचे सुनिल पांडे, सुधीर सोनवाल यांच्यासह पथकाला बोलावून घेतले. यानंतर आमदार सुरेश भोळे यांनी देखील पाटील कुटुंबियांची भेट घेवून महापालिका अधिकार्यांना उपाययोजनांच्या सूचना दिल्या.
परिसरात तात्काळ धुरळणी
घटनेनंतर माजी नगरसेवक कैलास सोनवणे यांनी दखल घेत सायंकाळी संपूर्ण शिवाजीनगर परिसरात धुरळणी केली. प्रत्येक गल्लीत स्वःता फिरून संस्थेच्या स्वयंसेवकांकडून त्यांनी फवारणी करून घेतली. तसेच परिसरातील नागरिकांशी चर्चा केली.
