जोधपूर : काळवीट शिकार प्रकरणी न्यायालयानं शिक्षा सुनावल्यानंतर गुरुवारपासून तुरुंगात असलेल्या सलमान खानची आज अखेर सुटका झाली आहे. जोधपूर सत्र न्यायालयानं त्याला जामीन मंजूर केला होता. सर्व न्यायालयीन आणि तुरुंगातील प्रक्रिया पूर्ण झाल्यानंतर त्याची सुटका करण्यात आली. सलमान जोधपूर विमानतळावर पोहोचला आहे.
सलमान खानच्या जामीन अर्जावर सत्र न्यायालयाचे न्यायाधीश रवींद्र कुमार जोशी यांनी आज निकाल दिला. सलमानला ५० हजार रुपयांच्या वैयक्तिक जातमुचलक्यावर आणि प्रत्येकी २५ हजार रुपयांच्या दोन जातमुचलक्यांवर जामीन मंजूर करण्यात आला. सर्व न्यायालयीन आणि तुरुंगातील प्रक्रिया पूर्ण करण्यात आल्यानंतर त्याची सुटका करण्यात आली. सुटकेनंतर तो जोधपूर विमानतळावर पोहोचला.
बिश्नोई समाजाचे वकील महिपाल बिश्नोई यांनी सांगितलं की, ‘सलमान न्यायालयाच्या परवानगीशिवाय देशाबाहेर जाऊ शकत नाही. ७ मे रोजी त्याला वैयक्तिकरित्या न्यायालयात हजर राहावं लागणार आहे.’ सत्र न्यायालयाच्या या निर्णयाला बिश्नोई समाजातर्फे उच्च न्यायालयात आव्हान दिलं जाऊ शकतं, असंही वृत्त आहे.
