जळगाव;- जैन इरिगेशन सिस्टिम्स लि.ची सहयोगी कंपनी जैन फार्मफ्रेश फुडसच्या मसाले प्रक्रिया प्रकल्पाचे उदघाटन मुख्यमंत्री देवेंद्र फडणवीस यांच्याहस्ते होणार आहे. यावेळी राष्ट्रवादी काँग्रेसचे ज्येष्ठ नेते खासदार शरद पवार हे अध्यक्षस्थानी राहतील. जैन फुड पार्क येथे असलेल्या या प्रकल्पाचे उदघाटन सकाळी ११.१५ ला होणार आहे.
सर्वसामान्य नागरिकांना देखील उच्च प्रतिच्या मसाल्याची चव चाखता यावी, या प्रमुख उद्देशाने या प्रकल्पाची निर्मिती करण्यात आलेली आहे. या मसाले प्रक्रिया प्रकल्पाची वार्षिक क्षमता २४ हजार टन इतकी आहे. यामध्ये आलं, लसुण, कांदा, मिरची यांची पेस्ट तयार केली जाईल. त्याप्रमाणे कोरडा मसाला देखील तयार केला जाणार आहे. पुर्णता सुरक्षित आणि उच्च दर्जाचे मसाले ग्राहकांना उपलब्ध होणार आहे. एअर फिल्टरच्या माध्यमातून शुद्ध हवेचा पुरवठा केला जाणार आहे. त्यामुळे मालाचा दर्जा नियंत्रित राखण्यासाठी मोठा उपयोग होणार आहे. या प्रकल्पासाठी १०० कोटींची गुंतवणूक करण्यात आली असुन, त्यासाठी लागणारा कच्चा माल जळगाव, धुळे, नंदुरबारसह मध्यप्रदेश व गुजरातला लागून असलेल्या परिसरातील शेतकऱ्यांकडुन घेतला जाणार आहे. या प्रकल्पाच्या माध्यमातून कान्हदेशातील शेतकरी जैन फार्मफ्रेश फुडसच्या करार शेतीशी जोडले जाणार असुन त्यामुळे शेतकऱ्यांचा आर्थिकस्तर वाढीस मोठा हातभारच लागणार आहे. प्रकल्पातून तयार होणारा माल सुरवातीच्या काळात प्रामुख्याने निर्यात केला जाणार आहे. आगामी काळात भारतात उपलब्ध होणार आहे. मसाले प्रक्रिया प्रकल्प उदघाटन सोहळ्यास उपस्थित राहण्याचे आवाहन जैन इरिगेशचे उपाध्यक्ष तथा व्यवस्थापकीय संचालक अनिल जैन यांनी केले आहे.
या उदघाटन सोहळ्यास पालकमंत्री तथा महसुलमंत्री चंद्रकांत (दादा) पाटील, कृषी मंत्री पांडुरंग फुंडकर, जलसंपदा मंत्री गिरीश महाजन, पाणी पुरवठा व स्वच्छता मंत्री बबनराव लोणीकर, उर्जा मंत्री चंद्रशेखर बावनकुळे, सहकार राज्यमंत्री गुलाबराव पाटील, जिल्हा परिषदेच्या अध्यक्षा श्रीमती उज्वला पाटील, विधानसभा सदस्य माजी मंत्री एकनाथराव खडसे, माजी मंत्री सुरेशदादा जैन, खासदार ए. टी. पाटील, खासदार रक्षा खडसे, माजी खासदार डॉ. उल्हास पाटील, आमदार सुधीर तांबे, आ. स्मिता वाघ, आ. चंदुलाल पटेल, आ. संजय सावकारे, आ. डॉ. सतीश पाटील, आ. हरिभाऊ जावळे, आ. सुरेश भोळे, आ. चंद्रकांत सोनवणे, आ. शिरीष चौधरी, आ. उन्मेश पाटील, आ. किशोर पाटील, महापौर ललित कोल्हे उपस्थित राहणार आहेत.
