जळगाव जिल्हा कारागृहात बंद्याला मारहाण, दोघांविरुद्ध गुन्हा
जळगाव : जिल्हा कारागृहात २७ सप्टेंबर रोजी सकाळी एका बंद्यावर दोन साथीदार बंद्यांनी मारहाण केल्याची घटना घडली. या प्रकरणी जिल्हापेठ पोलिस ठाण्यात दोन जणांविरुद्ध गुन्हा दाखल करण्यात आला आहे.
एमआयडीसी पोलिस ठाण्यातील एका गुन्ह्यात अटक झालेला सोहम गोपाल ठाकरे (२०) याला २० सप्टेंबर रोजी जिल्हा कारागृहातील बॅरेक क्रमांक १३ मध्ये ठेवण्यात आले होते. २७ सप्टेंबर रोजी सकाळी तो झोपेत असताना बंदी कुणाल गोपाल चौधरी याने त्याला पायाने धक्का देऊन उठविले व बाहेर येण्यास भाग पाडले. त्यानंतर अजय मोरे याने सोहमला पकडून ठेवले आणि कुणालने बॅरेकच्या दरवाजावर डोके आपटून त्याला गंभीर दुखापत केली. या मारहाणीमध्ये त्याच्या कपाळ व नाकाला दुखापत होऊन रक्तस्त्राव झाला.
घटनेच्या वेळी इतर बंद्यांनी हस्तक्षेप करून सोहमची सुटका केली. मात्र कर्मचारी घटनास्थळी उशिरा पोहोचल्याने नाराजी व्यक्त होत आहे. याप्रकरणी पीडित सोहम ठाकरे याने जिल्हापेठ पोलिस ठाण्यात फिर्याद दिली असून, त्यावरून कुणाल चौधरी व अजय मोरे या दोघांविरुद्ध मारहाणीचा गुन्हा नोंदवण्यात आला आहे.
