चिपळूण :- चार दिवस झालेल्या मुसळधार पावसामुळे चिपळूण तालुक्यातील तिवरे धरण फुटले आहे. धरणाच्या पाणलोट क्षेत्रातील किमान सात गावे पाण्याखाली गेली आहेत. या घटनेने परिसरात हाहाकार माजला आहे. मंगळवारी रात्री ८ ते ९च्या सुमारास ही घटना घडली असून यात २३ ते २५ जण वाहून गेल्याची भीती व्यक्त केली जात आहे. तर दोन मृतदेह सापडले आहेत. या ठिकाणी एनडीआरएफचं पथक दाखल झालं आहे.
रत्नागिरीतील तिवरे धरणाचा गुगल मॅपवरील फोटो
कोकण आणि पश्चिम किनारपट्टीवर गेल्या चार दिवसांपासून मुसळधार पाऊस पडतो आहे. या पावसाचा जोर इतका वाढला की तिवरे धरण फुटले आहे. धरणात मोठा पाणीसाठा झाल्याने एका बाजूला भगदाड पडले आहे. त्यामुळेच शेजारील गावांमध्ये सतर्कतेचा इशाराही दे्ण्यात आला आहे. ही घटना समजताच वरिष्ठ अधिकारी, पोलीस आणि पाटबंधारे विभागाचे अधिकारीही घटनास्थळी दाखल झाले आहेत. धरण फुटल्याने ओवळी, रिक्टोली, दादर, नांदिवसे, कळकवणे या गावांशी संपर्क तुटला आहे. २००० साली या धरणाचं काम पूर्ण झालं होतं. मात्र गेल्या काही वर्षांमध्ये या धरणाच्या दुरूस्तीकडे कोणतंही लक्ष देण्यात आलेलं नव्हतं अशी तक्रार ग्रामस्थांनी केली आहे. इतकंच नाही तर तिवरे धरणाला गळती लागल्याचीही तक्रार ग्रामस्थांनी केली होती. मात्र त्याकडे सपशेल दुर्लक्ष करण्यात आलं.
