बंगळुरू : कोरोनाबद्दल कर्नाटक सरकारने मोठा निर्णय जाहीर केला आहे. कर्नाटकचे मुख्यमंत्री येडीयुरप्पा यांनी राज्यात 8 दिवस सर्वच गर्दीची ठिकाणी बंद ठेवण्याचा निर्णय घेतला आहे.
देशात कोरोना व्हायरसचा शिरकाव झाल्यानंतर खबरदारी सार्वजनिक ठिकाणी लोकांना न येण्याचं आवाहन प्रशासन आणि सरकारकडून करण्यात येत आहे. याच पार्श्वभूमीवर कर्नाटक सरकारने राज्यात 8 दिवस सर्वच गर्दीची ठिकाणी बंद ठेवण्याचा निर्णय घेतला आहे.
उद्यापासून पुढील एक आठवडाभर, कर्नाटकमध्ये मॉल, चित्रपटगृह, पब, क्लब, प्रदर्शन, स्विमींग पूल, उन्हाळी शिबीर, स्पोर्ट्स इव्हेंट, मंगलकार्यालय आणि संमेलनं बंद ठेवण्याची घोषणा केली आहे. तसेच, जोपर्यंत हा कोरोनाचा काळ संपुष्टात येत नाही, तोपर्यंत प्रत्येकाने प्रवास टाळला पाहिजे, असेही येडीयुरप्पा यांनी म्हटले आहे. कलबुर्गी येथे कोरोनामुळे मृत्युमुखी पडलेल्या वृद्ध व्यक्तीच्या संपर्कात 31 लोकं आले होते. या सर्व लोकांची ओळख पटवून त्यांची तपासणी केली जाणार असल्याचेही येडीयुरप्पा यांनी म्हटले.
